"Türkiyə Suriyaya hərbi yardım etməyə hazırdır"

Suriya tərəfindən rəsmi müraciət olacağı təqdirdə Ankara Dəməşqə müdafiə qabiliyyətinin gücləndirilməsi istiqamətində yardım etməyə hazırdır. 

Sfera.az türk mediasına istinadən xəbər verir ki, bu barədə Türkiyə Müdafiə Nazirliyindən bildirilib.

Məlumata görə, Türkiyə artıq əvvəllər Suriyanın müdafiə qabiliyyətinin artırılmasına və terrorla mübarizəyə dəstək verəcəyini bəyan etmişdi.

Nazirlik həmçinin İsrailin Suriyaya endirdiyi hava zərbələrinə münasibət bildirib. Qeyd olunub ki, bu hücumlar nəticəsində Suriyada yerləşən Türkiyə hərbi kontingentinə və şəxsi heyətə heç bir ziyan dəyməyib:“İsrailin hava hücumları nəticəsində Suriyadakı qoşunlarımız və şəxsi heyətimizlə bağlı heç bir mənfi vəziyyət yoxdur”.

Türkiyə Müdafiə Nazirliyi, eyni zamanda, Ankaranın Suriyanın ərazi bütövlüyü və siyasi birliyini dəstəklədiyini vurğulayıb.

“Məqsədimiz ərazi bütövlüyü və siyasi birliyin təmin olunduğu təhlükəsiz, sabit və güclü Dəməşqdir. Ölkəmiz Suriyanın bütövlüyü əsasında bölgədə sabitlik və təhlükəsizliyin bərqərar edilməsinə yönəlmiş istənilən konstruktiv prosesi dəstəkləyir”, – deyə bəyanatda qeyd olunub.

Nazirlik İsrailin Suriyaya qarşı hücumlarının regionda sülh və sabitliyin təmin olunmasına təhlükə yaratdığını da bildirib və bu hücumların dərhal dayandırılmalı olduğunu vurğulayıb: “İsrail bölgəni xaosa sürükləyən hücumları dayandırmalıdır”.

Fidan Hacızadə
Sfera.az