“Green Card 2025” müraciətləri nə vaxt başlayacaq? – Tarixlər açıqlandı

ABŞ-də yaşamaq və işləmək arzusunda olan milyonlarla əcnəbinin səbirsizliklə gözlədiyi “Green Card” (Çeşidlilik Miqrasiya Vizası) proqramı üçün müraciət tarixləri yaxınlaşır. 2025-ci il üçün nəzərdə tutulan “DV Lottery” prosesi ilə bağlı geri sayım artıq başlayıb.

Sfera.az “NTV”yə istinadən xəbər verir ki, hər il milyonlarla insanın iştirak etdiyi bu proqram üzrə müraciətlər adətən oktyabr ayının əvvəlində başlayır və noyabrın ilk həftəsinə qədər davam edir. 2024-cü il üçün müraciətlər 2 oktyabr - 5 noyabr tarixləri arasında keçirilmişdi.

Ekspertlər 2025-ci ildə də eyni dövr ərzində müraciətlərin qəbul ediləcəyini bildirirlər.

ABŞ hökuməti tərəfindən təşkil olunan “DV Lottery” proqramında iştirak pulsuzdur. Müraciətlər yalnız rəsmi internet saytı olan “dvprogram.state.gov” üzərindən qəbul edilir. Proqramda iştirak üçün şəxsi məlumatların düzgün daxil edilməsi və şəkil tələblərinə tam cavab verilməsi əsas şərtlərdəndir.

Qeyd edək ki, “Green Card” sahibləri ABŞ-də daimi yaşamaq, işləmək və sonrakı mərhələdə vətəndaşlıq almaq hüququ əldə edirlər. Proqramın nəticələri isə adətən növbəti ilin may ayında açıqlanır.

Rəsmi tarixlər yaxın günlərdə ABŞ Dövlət Departamenti tərəfindən elan ediləcək.

Bəsti Rəfizadə
Sfera.az