"Ukraynanın sərhədlərini və əhalisini müəyyən etməliyik" - Orban

Macarıstanın Baş naziri Viktor Orban Avropa İttifaqını Ukrayna ilə əlaqələr qurmazdan əvvəl bu ölkənin statusunu dəqiq müəyyənləşdirməyə çağırıb. 

Sfera.az xarici KİV-ə istinadən xəbər verir ki, bu barədə o, X sosial şəbəkəsindəki hesabında açıqlama verib.

“Biz Ukraynanın sərhədlərini və əhalisini müəyyən etməliyik. Hazırda Kiyevin nə olduğunu və harada yerləşdiyini bilmirik”,- deyə Orban qeyd edib.

Orbanın sözlərinə görə, ilk növbədə sülh razılaşmasına nail olunmalı, daha sonra Rusiya ilə uzunmüddətli sazişlər imzalanmalı və yalnız ondan sonra Ukrayna ilə tərəfdaşlıq qurulmalıdır.

Xatırladaq ki, iyunun 26-da Macarıstan Ukraynanın Avropa İttifaqına üzvlüyü ilə bağlı danışıqlara başlamağa dair qərarın qəbuluna Aİ sammitində təkcə etiraz edən ölkə olub. Aİ Şurasına təqdim edilən və Kiyev üçün danışıqlar fəsillərinin açılmasını nəzərdə tutan bəyanat layihəsi 26 ölkənin dəstəyini qazansa da, Budapeşt bu qərarın qəbuluna mane olaraq məsələnin oktyabr ayına qədər təxirə salınmasına səbəb olub.

Baş nazir sonrakı açıqlamasında bildirib ki, Macarıstanın bu qərarı verməsi bir neçə əsas səbəblə bağlıdır: Ukraynanın Macarıstana qarşı getdikcə artan hücumları, Budapeştin Avropa iqtisadiyyatı üçün mümkün dağıdıcı nəticələrdən qaçmaq istəyi və Macarıstan iqtisadiyyatına ola biləcək mənfi təsirlərlə bağlı narahatlıq.

Qeyd edək ki, bundan əvvəl də Macarıstan Ukraynaya silah tədarükünün maliyyələşdirilməsinə qarşı çıxmışdı.

Fidan Hacızadə
Sfera.az