Ötən gün İsrail ordusunun Suriyanın Müdafiə Nazirliyinin və parlamentin binasını raketlərlə vurması beynəlxalq gündəmin əsas müzakirə mövzusuna çevrilib.

Sfera.az-a mövzu ilə bağlı açıqlama verən politoloq Yusif Bağırzadə hücumun uzunmüddətli hərbi qarşıdurmaya səbəb olmayacağını bildirib.

Politoloqun sözlərinə görə, Suriya hakimiyyətinə yeni gəlmiş Əhməd Əl Şara rəhbərliyi İsrail tərəfindən legitim siyasi quruluş kimi qəbul edilmir:

“Nəzərə almaq lazımdır ki, İsrail rəsmiləri əvvəldən Əl Şaranın hakimiyyətə gəlməsinə isti yanaşmayıblar. Bu münasibət onun keçmiş fəaliyyətinə və Türkiyə ilə hazırda qurduğu sıx əlaqələrə əsaslanır. Böyük ehtimalla yaxın gələcəkdə Suriyada Türkiyənin hərbi bazasının yaradılmasının şahidi olacağıq”.

Ekspert qeyd edib ki, bölgədə yaşayan druz icması da gərginliyin dərinləşməsində rol oynayır. Politoloqun sözlərinə görə, hazırda İsrail, Livan və Suriya ərazisində təxminən bir milyona yaxın druz yaşayır:

“Druzlar əsasən xristian ərəblərdir. Onların bir qismi Holan təpələrində, digər qismi isə İsrail-Suriya sərhədinə yaxın ərazilərdə yaşayır. Bu ərazilərdə yerli budinlərlə (icmalarla) mütəmadi münaqişələr baş verir. Əl-Şara hakimiyyətə gələndən sonra druz qəbilə başçıları İsrailin təhlükəsizlik orqanları ilə görüşlər keçiriblər. Bu da İsrailin Suriyaya qarşı hərbi addımlar atmasına səbəb kimi göstərilə bilər”.

Bağırzadənin sözlərinə görə, Suriya ordusu druzların yaşadığı bölgələrdəki qarşıdurmalara müdaxilə edərkən, ABŞ İsraildən bu ərazilərdən çəkilməsini tələb edib. Hazırda ABŞ Konqresində İsrailə 2 milyard dollarlıq hərbi yardım paketi hazırlanır. Bu paket çərçivəsində bunker əleyhinə raketlərin İsrailə göndəriləcəyi gözlənilir.
“Əl-Şaranın qurduğu yeni hökumətdə druz icmasından bir nümayəndə nazir postuna təyin edilsə də, bu icma kifayət qədər təmsil olunmadığını bildirərək narazılıq edir. Lakin hazırkı münaqişənin tezliklə səngiyəcəyi gözlənilir və bu hücumun qısamüddətli olacağı ehtimal edilir”, - deyə politoloq vurğulayıb.

Yusif Bağırzadə əlavə edib ki, hazırda Əl-Şara hakimiyyəti ərəb ölkələri - xüsusilə BƏƏ və Qətər tərəfindən dəstəklənir. Suriya hökumətinin gələcəkdə “Böyük İbrahim Sazişi”nə qoşularaq İsraili rəsmi şəkildə tanıması da gündəmdədir.

Bəsti Rəfizadə
Sfera.az

Raketlərlə verilən mesaj: İsrail Suriyadakı hakimiyyəti tanımır