10 həftəlik körpə dağdan 50 metr yuvarlanıb sağ qaldı
Avstriyada Alp dağlarında yamacdan 50 metr aşağı yıxılan körpə uşaq arabasından düşərək sağ qalıb.
Sfera.az "Bild"ə istinadən xəbər verir ki, hadisə Almaniyadan olan bir ailənin 10 həftə əvvəl doğulan körpəsi ilə tətilə getdiyi Tirol dağlarında baş verib. Körpənin 23 yaşlı anası örüş sahəsinin darvazasını açmaq istəyərkən uşaq arabası qəfildən yamacdan aşağı yuvarlanıb. Nəticədə bir neçə dəfə çevrilib və körpə yerindən yıxılıb.
Dağ-xilasediciləri körpəni 1700 metr hündürlükdə Landek bölgəsində dağ çəmənliyində tapıb və ailəni ən yaxın xəstəxanaya çatdırıblar. Ağır yaralanan körpə daha sonra İnsbruk Universiteti Xəstəxanasına aparılıb. Hazırda onun həyatı üçün təhlükə yoxdur.
Klinikanın sözçüsü Yohannes Şvamberqer "Hadisənin ciddiliyini nəzərə alsaq, uşaq inanılmaz dərəcədə şanslıdır", deyib.
