Ukrayna Təhlükəsizlik Xidməti Putinin 2 yaxın adamını AXTARIŞA VERDİ
Ukrayna Təhlükəsizlik Xidməti (UTX) Rusiya Prezident Administrasiyası rəhbərinin birinci müavini Sergey Kiriyenkonu və Kursk vilayətinin müvəqqəti icraedici qubernatoru Aleksandr Xinşteyni rəsmi şəkildə axtarışa verdiyini elan edib.
Sfera.az xəbər verir ki, hər iki şəxs Ukrayna dövlətçiliyinə qarşı yönəlmiş hərəkətlərdə, xüsusilə də işğal olunmuş ərazilərdə qeyri-qanuni fəaliyyətlərdə iştirakda ittiham olunur.
Onlara qarşı Ukrayna Cinayət Məcəlləsinin müvafiq maddələri üzrə cinayət işi açılıb. Bu maddələrdə dövlət sərhədinin pozulması, suverenliyin pozulması və Rusiya tərəfindən işğal olunmuş Ukrayna ərazilərində qanunsuz idarəetmə strukturlarının yaradılması nəzərdə tutulur.
UTX-nin məlumatında bildirilir ki, Sergey Kiriyenko işğal olunmuş ərazilərdə Rusiya administrasiyasının qurulmasında və qanunsuz "seçkilərin" təşkilində mühüm rol oynayıb. O, həmçinin Rusiya Federasiyasının informasiya və ideoloji siyasətində əsas simalardan biri hesab olunur.
Aleksandr Xinşteyn isə UTX-nin iddiasına görə, Kursk vilayətindən işğal olunmuş ərazilərə humanitar və hərbi dəstək təşkili, yerli əhalinin ruslaşdırılması və inzibati nəzarətin qurulmasında iştirak edib.
Hər iki şəxs artıq Ukrayna hüquq-mühafizə orqanlarının axtarış bazasına daxil edilib, onların beynəlxalq axtarışa verilib-verilməyəcəyi barədə isə əlavə açıqlama verilməyib.
Bu qərar Ukrayna ilə Rusiya arasında davam edən müharibə və işğal olunmuş ərazilərlə bağlı hüquqi-siyasi mübarizənin bir hissəsi kimi qiymətləndirilir.
