İsti hava 10 gündə 2300 insanın həyatına son qoyub

Qlobal istiləşmə və iqlim dəyişikliyinin zərərləri ilə bağlı narahatlıqlar artdığı bir vaxtda, avropalı alimlərin apardığı yeni araşdırma diqqət çəkib.

Sfera.az xarici mediaya istinadən xəbər verir ki, London İmperial Kolleci və London Gigiyena və Tropik Tibb Məktəbinin alimləri tərəfindən aparılan tədqiqata görə, 23 iyun – 2 iyul tarixləri arasında Avropanı bürüyən isti dalğası 12 şəhərdə təxminən 2300 insanın həyatına son qoyub.

Tədqiqatçılar bu il temperaturun mövsümi normalardan 1-4 dərəcə yüksək olduğunu müəyyən ediblər. Analizlər göstərib ki, baş verən ölümlərin azı 1500-ü birbaşa iqlim dəyişikliyinin nəticəsidir. London İmperial Kollecinin iqlim tədqiqatçısı Dr. Ben Clarke qlobal istiləşmənin təhlükələrinə diqqət çəkərək bildirib: “İqlim dəyişikliyi havanın olması lazım olduğundan daha isti olmasına səbəb olur və bu, prosesi çox daha təhlükəli edir”.

Alimlər iqlim dəyişikliyinə qarşı daha ciddi tədbirlər görülməsinin vacibliyini vurğulayıblar.

Fidan Hacızadə

Sfera.az