Fransa 170-dən çox reysi ləğv etdi

Fransada hava nəzarətçilərinin iki günlük tətili hava nəqliyyatında ciddi pozuntulara səbəb olub. “Ryanair” hava yolu şirkəti 170-dən çox reysin ləğv edildiyini, bunun da 30 mindən artıq sərnişinin planlarını pozduğunu bildirib.

Sfera.az xarici mediaya istinadən xəbər verir ki, tətil qərarı iş şəraitinə etiraz edən iki həmkarlar ittifaqı tərəfindən verilib. Paris və Nitsa hava limanlarında yüzlərlə uçuşun ləğv olunduğu bildirilir. Fransa Nəqliyyat naziri Filip Tabaro bu addımı “qəbuledilməz” adlandıraraq sərt tənqid edib.

“Ryanair”in açıqlamasına görə, tətil yalnız Fransa daxilində deyil, həm də bu ölkənin hava məkanından keçən Britaniya, İrlandiya, İspaniya və Yunanıstana olan uçuşlara da təsir edib. Şirkətin rəhbəri Maykl OLiri hava nəzarətçilərini “Avropalı ailələri girov götürməkdə” günahlandıraraq Avropa Komissiyasını təcili müdaxiləyə çağırıb.

Fransanın Mülki Aviasiya İdarəsi (DGAC) hava yollarına müraciət edərək, bir çox hava limanlarında uçuş sayını azaltmağı tövsiyə edib. Cümə günü Parisin Şarl de Qoll, Orli və Bove hava limanlarında uçuşların 40 faiz azalacağı gözlənilir.

Tətilə səbəb kimi UNSA-ICNA həmkarlar ittifaqı kadr çatışmazlığı və idarəetmə problemlərini göstərib. Hökumətlə aparılan danışıqlarda razılıq əldə olunmayıb.

Bəsti Rəfizadə
Sfera.az