ABŞ ilə İsveç arasında anlaşılmazlıq yarandı - Özünü aldadılmış hiss edir...

İsveçrə ilə ABŞ arasında 2022-ci ildə bağlanmış “F-35” qırıcı təyyarələrinin alqı-satqısı üzrə müqavilə ölkədə milli qalmaqala çevrilib.

Fransanın nüfuzlu “Le Monde” nəşri yazır ki, İsveçrə hökuməti əvvəllər elan edilmiş 6 milyard İsveçrə frankı dəyərindəki razılaşmanın xərclərinin artmasından sonra özünü aldadılmış hiss edir.

Sfera.az “NTV”yə istinadən xəbər verir ki, məlumata görə, ABŞ-dən alınacaq 36 ədəd “F-35” təyyarəsi üçün əlavə maliyyə tələb olunacaq və bu, vergi ödəyicilərinə əlavə 1 milyard franka başa gələ bilər. İsveçrənin müdafiə naziri Martin Pfister 25 iyunda bu rəqəmi rəsmi şəkildə təsdiqləyib. Beləliklə, müqavilədə qeyd olunduğu iddia edilən “sabit qiymət” maddəsi faktiki olaraq qüvvəsini itirib.

ABŞ tərəfi isə qiymətlə bağlı yanlış anlaşılmanın olduğunu bildirir. Buna baxmayaraq, İsveçrə hökuməti müqavilədə konkret rəqəmlərin qeyd olunduğunu əsas gətirərək, qiymət artımına etiraz edir.

İsveçrədə məsələ yalnız iqtisadi yox, həm də siyasi qalmaqal səviyyəsinə yüksəlib. Müxalifət və bəzi millət vəkilləri təyyarə seçimi prosesində şəffaflığın pozulduğunu və ABŞ istehsalı olan “F-35”lərin Fransanın “Rafale” təyyarələrinə qarşı qərəzli şəkildə üstün tutulduğunu iddia edir.

Sosial Demokrat Partiyasından olan millət vəkili Pierre Alain Fridez, tenderin şərtlərinin yalnız “F-35”lərə uyğunlaşdırıldığını, Rafale qarşısında daha bahalı olan bu təyyarələrin seçilməsi üçün “sabit qiymət” mifinin uydurulduğunu bildirib. O, bu prosesdə bir sıra şəffaflıq qaydalarının pozulduğunu və bunun əsl dövlət skandalı olduğunu vurğulayıb.

Ekspertlər isə bildirirlər ki, əlavə xərclər 2 milyard franka qədər çata bilər. “F-35” təyyarələrinin 2027–2030-cu illər arasında İsveçrə ordusuna tədricən təhvil verilməsi planlaşdırılır.

İndi isə sual açıq qalır: İsveçrə ABŞ tərəfindən aldanıbmı, yoxsa bu sadəcə hərbi-siyasi manevrlərin nəticəsidir?

Bəsti Rəfizadə
Sfera.az