Bu telefon ABŞ-də istehsal edilmirmiş - Sirlər üzə ÇIXDI

Trampın şirkəti “Tramp Organization”ın yeni ağıllı telefonu “T1 Phone”un rəsmi saytında əvvəllər böyük hərflərlə yer alan “MADE IN THE USA” (ABŞ-də istehsal edilib) ifadəsi səssizcə silinib.

Sfera.az xarici mediaya istinadən xəbər verir ki, saytda “MADE IN THE USA” ifadəsi “Amerikan dəyərləri nəzərə alınaraq dizayn olunub” və “Hər cihazın arxasında Amerika əlləri var” kimi daha ümumi və qeyri-müəyyən ifadələrlə əvəz olunub. Ekspertlər belə dəyişikliklərin məhsulun əslində ABŞ-də deyil, sadəcə orada montaj edildiyini göstərmək məqsədi daşıdığını vurğulayırlar.

Bu dəyişikliklər, ABŞ-də sıfırdan ağıllı telefon istehsalı müəssisəsinin qurulmasının çətinliyi və telefonun Çin istehsalı modellərə bənzəməsi ilə bağlı yaranan şübhələrdən sonra baş verib. Bundan başqa, telefonun 6,78 düym kimi təqdim edilən ekran ölçüsü 6,25 düymə endirilib, “12GB RAM” detayı isə saytdan tamamilə silinib. Telefonun çatdırılma tarixi də sentyabr ayından “bu ilin sonrakı dövrləri” kimi qeyri-müəyyən ifadəyə dəyişdirilib. 499 dollar qiymətə sahib olan Tramp “T1 Phone” ilə bağlı bu dəyişikliklər məhsulun vəziyyəti və keyfiyyəti haqqında yaranan sualları artırır.

Bəsti Rəfizadə

Sfera.az