Tramp İrana hücumu tarixi hadisə adlandırdı

ABŞ Prezidenti Donald Tramp NATO-nun Haaqa Zirvəsində çıxış edərək İran, İsrail və Qəzza ilə bağlı sərt açıqlamalar verib. O, ABŞ-nin İrana endirdiyi hücumun uğurlu olduğunu bildirib və nəticədə “möhtəşəm bir dağıntı” baş verdiyini deyib.

Sfera.az “Hürriyet”ə istinadən xəbər verir ki, Tramp çıxışında qeyd edib ki, hücum zamanı 30 “Tomahawk” raketi istifadə olunub və hamısı dəqiqliklə hədəfə dəyib:

“Bu, Naqasakiyə və Hiroşimaya atılan bombalar kimi müharibəni dayandıran bir hücum idi”.

O, bəzi Amerika media qurumlarını - “CNN”, “MSNBC” və “New York Times”ı “xain” adlandıraraq hücumu zəif göstərməkdə ittiham edib:

“Reytinq almaq üçün hər şeyə hazırsınız. Tramp olmasa reytinqiniz də olmazdı”.

Tramp çıxışında İranın artıq uran zənginləşdirə bilməyəcəyini, əks halda bunun illərlə vaxt aparacağını vurğulayıb. Hücum nəticəsində nüvə obyektlərinin dağılıb-dağılmadığına dair ziddiyyətli məlumatlara toxunaraq, görüntülərin “hər şeyin qapqara olduğunu” göstərdiyini deyib.

Bəsti Rəfizadə
Sfera.az