"Putinə dedim ki, köməyə ehtiyacım yoxdur" - Tramp

ABŞ Prezidenti Donald Tramp Ukrayna ilə bağlı vəziyyətin həllində irəliləyiş olduğunu bildirib.

Sfera.az xarici KİV-ə istinadən xəbər verir ki, o, NATO-nun Haaqa sammiti çərçivəsində Ukrayna Prezidenti Volodimir Zelenski ilə görüşəcəyini və münaqişə ilə bağlı son vəziyyəti müzakirə edəcəyini açıqlayıb.

“Mən Putinlə çoxsaylı danışıqlar aparmışam və o, olduqca mehriban davranır. Bildiyiniz kimi, o, mənə İranla bağlı yardım təklif edib. Amma mən ona bildirdim ki, İrana dair köməyə ehtiyacım yoxdur. Mənə Rusiya, daha dəqiq desək, Ukrayna münaqişəsinin həlli ilə bağlı yardım lazımdır”,- deyə Tramp bildirib.

ABŞ Prezidenti əlavə edib ki, Ukrayna lideri ilə “onun bəzi çətinliklərini” müzakirə edəcəklər.

Qeyd edək ki, Tramp ötən həftə də Rusiya və Ukraynanın müəyyən irəliləyiş əldə etdiyini bəyan etmişdi. Görüşün NATO sammiti çərçivəsində baş tutması gözlənilir və bu, Ukrayna böhranının diplomatik həlli istiqamətində növbəti mühüm addım kimi qiymətləndirilir.

Fidan Hacızadə

Sfera.az