Çexiyada özünü diş həkimi kimi təqdim edən 22 yaşlı kişi və ailə üzvləri 2023-cü ildə Havliçku Brod şəhərində stomatoloji klinika açıblar. Fırıldaqçıların hekayəsi dünya mətbuatında müzakirə mövzusuna çevrilib.

Sfera.az bildirir ki, gənc adam lisenziyası və tibbi təhsili olmadan iki il diş müalicə edib. O, “həkimliyi” internetdəki maarifləndirici videolardan öyrənib.

O müayinələr aparıb, problemi müəyyənləşdirib, dişlərini çəkib, kanalları müalicə edib və narkoz verib. Ona yalnız internetdən gələn təlimatlar və videolar kömək edib.

Adama tibb bacısı işləyən 50 yaşlı qadının köməklik etdiyi məlum olub. Polis qadının rəsmi olaraq səhiyyə sektorunda çalışdığı və klinikanı anesteziya və stomatoloji materiallarla - plomblar, təmizləyici tozlar, yapışdırıcılar, protezlər və s. təmin etdiyini bildirib:

Digər 44 yaşlı kişi xəstələr üçün protezlər düzəldib. İştirakçıların hansı qohumluq əlaqələrinin olduğu məlum deyil.

“Diş həkimi” və onun əlaltıları 4 milyon çex kronu, təxminən 186 min dollar qazanıblar. Polis bu klinika ilə bağlı hər hansı şikayətin olub-olmadığını dəqiqləşdirməyib.

Bu il iyunun əvvəlində üç nəfər həbs edilib, onların hamısı qanunsuz fəaliyyət, çirkli pulların yuyulması, təcavüzə cəhd, narkotik vasitələrin qanunsuz dövriyyəsi və oğurluqda ittiham olunub.

İndi hər birini 8 ilə qədər həbs cəzası gözləyir, təqsirləndirilən şəxslər günahlarını etiraf ediblər.

Çexiya Stomatoloji Palatasının prezidenti Roman Şmuçler bildirib ki, ölkədə belə hallar müntəzəm olaraq, ildə təxminən 10 dəfə baş verir.

"Belə halların qarşısını alacaq sistem yaratmaq yaxşı olardı. Görünür, nəzarət mexanizmləri iflasa uğrayıb"- deyə o, izah edib.

Qeyd edək ki, Çexiya Parlamenti 2024-cü ildə Avropa İttifaqından kənar ölkələrdən olan diş həkimlərinin iş tapmasını asanlaşdıran qanun layihəsini qəbul edib.

Aysel

“Stomatoloq” “YouTube”un məsləhəti əsasında xəstələri müalicə edib