"Bizə söz verdiklərini yerinə yetirmədi" - Əraqçi

İranın xarici işlər naziri Abbas Əraqçi ABŞ-ni diplomatik prosesi pozmaqda ittiham edib. 
 

Sfera.az xəbər verir ki, “NBC” televiziyasına müsahibə verən Əraqçi bildirib ki, İsrailin İrana qarşı hava hücumları fonunda Vaşinqtonun susqunluğu iki ölkə arasında güvənsizliyi dərinləşdirib.

“ABŞ-nin davranışları diplomatiyaya xəyanətdir. Biz artıq onlara necə güvənəcəyimizi bilmirik”, – deyə nazir vurğulayıb.

Əraqçi qeyd edib ki, əgər ABŞ doğrudan da İranın nüvə proqramı ilə bağlı problemi diplomatik yolla həll etmək istəyirsə, bunun üçün real addımlar atmalıdır: “Bəlkə də onların məqsədi heç vaxt danışıqlar olmayıb, sadəcə hücum planlarını gizlətmək üçün prosesə qoşulublar”.

Nazir ABŞ-nin Orta Şərq üzrə xüsusi nümayəndəsi Stiv Vitkofun da Tehrana verdiyi vədlərə əməl etmədiyini bildirib. “Hər görüşümüzdə fikrini dəyişirdi. Güvən problemi yaranıb. Bizə söz verdiyi heç bir məsələni yerinə yetirmədi”, – deyə o əlavə edib.

İran rəsmisi həmçinin qeyd edib ki, ABŞ və İsrailin nüvə obyektlərinə mümkün hücumu İranın texnoloji biliklərini məhv edə bilməz: “Bir və ya iki obyekti dağıtsalar da, texnologiya bizdədir və bu, geri qaytarılmazdır. Bunu özümüz inkişaf etdirmişik. Savaş zamanı hər iki tərəf hücuma keçər. İsrailə cavab verdiyimiz kimi, ABŞ də bu münaqişəyə qoşularsa, eyni şəkildə cavab alacaq”.

İsrailin ali dini lider Ayətullah Əli Xameneiyə qarşı təhdidlərini də şərh edən Əraqçi bunu “tarixin ən böyük cinayətlərindən biri” kimi dəyərləndirib və belə bir addımın mümkün olmadığını deyib.

Bəsti Rəfizadə
Sfera.az