İran PUA-ları İsrailə nə zaman çatacaq?
İran tərəfindən buraxılan pilotsuz təyyarələrin yaxın saatlarda İsrailə çatacağı gözlənilir.
Sfera.az Teleqraf-a istinadən xəbər verir ki, bu barədə İsrail KİV məlumat yayıb.
İsrail Müdafiə Qüvvələri bundan əvvəl bildirmişdi ki, İrandan İsrailə doğru 100-dən çox PUA buraxılıb və Hərbi Hava Qüvvələri onların qarşısını almaq üçün çalışır.
Belə dronların İrandan İsrailə çatması ümumiyyətlə yeddi saat çəkir.
Bir saat əvvəl İraq üzərində bir neçə pilotsuz təyyarə aşkarlanıb, bu o deməkdir ki, onlar İsrail ordusu tərəfindən vurulmasalar, yaxın bir neçə saat ərzində İsrailə çatacaqlar.
Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə obyektinin məhv edildiyini təsdiqləyib.
Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, ali dini rəhbərin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid və digər yüksək rütbəli şəxslər, o cümlədən üç nüvə alimi həlak olub.
İran isə bir neçə saat sonra cavab zərbələrinə başlayıb. Tehran İsrail istiqamətində 100-dən çox pilotsuz təyyarə göndərib.
