Misirdə Qəzza ilə həmrəylik məqsədilə keçiriləcək “Qlobal Qəzza Yürüşü”nə qatılmaq üçün ölkəyə gələn bir sıra beynəlxalq fəalların saxlanıldığı bildirilib.

Sfera.az xaric mediaya istinadən xəbər verir ki, “Qlobal Qəzza Yürüşü”nün Beynəlxalq Koordinasiya Komitəsinin verdiyi açıqlamada, Misirə daxil olduqdan sonra bir neçə iştirakçının təhlükəsizlik qüvvələri tərəfindən həbs edildiyi və onların dərhal azad olunması üçün rəsmi çağırış edildiyi vurğulanıb.

Qeyd edilir ki, Misirə gələn fəallar Qəzzada davam edən humanitar böhrana diqqət çəkmək və Refah Sərhəd Qapısında keçiriləcək sülh yürüşünə qatılmaq niyyətində olublar. Saxlanılanlar arasında Əlcəzair, Tunis, Mərakeş, Almaniya, Avstraliya, Fransa və Türkiyədən olan fəallar da var.

Komitə bildirib ki, yürüşlə bağlı hazırlıqlar iki ay öncədən başlanılıb və bu müddət ərzində Misirin xarici ölkələrdəki səfirlikləri ilə əlaqə qurulub, eyni zamanda Misir Xarici İşlər Nazirliyi və yerli hakimiyyətlə birbaşa koordinasiya təmin edilib. Diplomatik kanallar vasitəsilə bütün prosedurların yerinə yetirildiyi də bəyan edilib.

Açıqlamada Misir Xarici İşlər Nazirliyinin yürüşlə bağlı bəyanatının məmnuniyyətlə qarşılandığı və ölkənin Qəzzədəki vəziyyətlə bağlı daha əvvəl səsləndirdiyi mövqeyə uyğun olaraq bu sülh təşəbbüsünə dəstək verməsinin vacibliyi qeyd olunub.

Hazırda dünyanın müxtəlif ölkələrindən olan fəallar yürüşə qatılmaq üçün Misirin paytaxtı Qahirəyə toplaşırlar. Onlar 12 iyun tarixində bir araya gəlməyi, 15 iyunda isə Refah Sərhəd Qapısına doğru yola çıxmağı planlaşdırırlar.

Bu arada, təxminən 2 min fəaldan ibarət “Məğrib Müqavimət Karvanı” Tunisdən yola düşərək artıq Liviyaya çatıb.

Bəsti Rəfizadə
Sfera.az

Misirdə “Qlobal Qəzza Yürüşü” iştirakçıları saxlanıldı - FOTO