Avropa İttifaqı yaxın günlərdə Rusiyaya qarşı 18-ci sanksiyalar paketini qəbul etməyi planlaşdırır. Bununla yanaşı, ABŞ və digər Qərb ölkələri də Rusiyaya qarşı davamlı şəkildə iqtisadi və maliyyə məhdudiyyətləri tətbiq edirlər. Lakin artıq uzun müddətdir ki, bu sanksiyaların gözlənilən nəticələri vermədiyi müşahidə olunur. Ortaya belə bir sual çıxır: Rusiya sanksiyalardan dolayısı ilə xilas ola bilir?

Sfera.az-a açıqlama verən professor Elşad Mirbəşiroğlu bildirdi ki, sanksiyalar Rusiyanın iqtisadiyyatına müəyyən qədər mənfi təsirlər göstərir.

Amma E.Mirbəşiroğlu qeyd etdi ki, bu təsirlər Rusiyanı yetəri qədər zəiflətmir.

“Rusiyaya qarşı həm Avropa İttifaqı, həm də ABŞ tərəfindən ardıcıl olaraq çoxsaylı sanksiyalar tətbiq olunub. Bu sanksiyalar nəticəsində bir çox beynəlxalq şirkətlər Rusiya bazarını tərk edib, rubl ciddi şəkildə dəyər itirib. Ancaq bu proses təkcə mənfi nəticələr vermədi – əksinə, müəyyən sahələrdə müsbət təsirlər də müşahidə edildi. Xarici şirkətlərin getməsi yerli istehsalçılara imkanlar yaratdı, sahibkarlıq inkişaf etməyə başladı. Rusiya bazarındakı boşluqları yerli müəssisələr doldurdu”, – deyə professor qeyd edib.

E. Mirbəşiroğlunun fikrincə, Rusiya son illər ərzində daxili bazarı gücləndirmək üçün əhəmiyyətli addımlar atıb, yeni istehsal sahələri yaradıb, idxaldan asılılığı azaldıb və iqtisadiyyatda struktur dəyişikliyinə gedib. "Bu da onu göstərir ki, sanksiyalar gözlənildiyi qədər dağıdıcı təsir göstərməyib" , - deyən E.Mirbəşiroğlu bildirib ki, Qərbin özü də tətbiq etdiyi bu sanksiyalardan iqtisadi baxımdan ciddi zərər görür:

“Avropa ölkələri Rusiyaya qarşı iqtisadi məhdudiyyətlər tətbiq etsə də, hələ də enerji sahəsində asılılığını tam aradan qaldıra bilməyib. Rusiya enerji daşıyıcıları hələ də Avropa bazarına daxil olur. Bu isə o deməkdir ki, Avropa bir tərəfdən sanksiya tətbiq edir, digər tərəfdən isə Rusiyaya enerji üçün ödəniş edərək dolayısı ilə onun iqtisadiyyatına maliyyə dəstəyi göstərir. Bu, Avropa siyasətində ziddiyyətli yanaşmanın göstəricisidir”.

Müsahibimizin sözlərinə görə, artıq Rusiya cəmiyyəti və iqtisadiyyatı tətbiq olunan sanksiyalara qarşı müəyyən mənada “immunitet” qazanıb və bu səbəbdən yeni sanksiyalar paketlərinin də ciddi effekt verəcəyi ehtimal olunmur:

“Sanksiyaların sayının artması (artıq 18-ci paket gündəmdədir) onların effektivliyini artırmır. Əksinə, bu, daha çox siyasi və informasiya xarakteri daşıyır, yəni Qərb göstərmək istəyir ki, hələ də Rusiyaya qarşı fəaldır. Amma bu fəaliyyət real nəticə vermirsə, sanksiyalar sadəcə bir növ blöfə çevrilir”.

O, əlavə edib ki, sanksiyalar təkcə Rusiyaya deyil, Avropa ölkələrinin iqtisadiyyatına da zərbə vurub:

"Xüsusilə 2022–2023-cü illərdə, müharibənin ilk mərhələlərində bir çox Avropa ölkəsində fermerlərin etiraz aksiyaları keçirilib. Onlar bazar itkisi və məhsullarını sata bilməmələri səbəbilə ciddi iqtisadi ziyan gördüklərini bildiriblər. Bu reallıqları nəzərə alaraq, hesab edirəm ki, Qərbin sanksiya siyasəti yalnız Rusiyanı deyil, Avropanı da vurur və effektiv nəticə vermir. Ona görə də yeni sanksiyalar paketi də Rusiyanı geri çəkilməyə məcbur edəcək qədər güclü olmayacaq”.

Bəsti Rəfizadə
Sfera.az

Rusiya “immunitet” qazanıb -Sanksiyalar niyə təsir etmir?