ABŞ-ın Los-Anceles şəhərində İmmiqrasiya və Gömrük Mühafizəsi (ICE) tərəfindən saxlanılan qeyri-qanuni mühacirlərə dəstək məqsədilə keçirilən nümayişlər davam edir.

Sfera.az xəbər verir ki, Los-Anceles şəhərinin meri Karen Bass şəhərin mərkəzində komendant saatı elan edib. Digər tərəfdən, ABŞ prezidenti Donald Tramp administrasiyasının Kaliforniya ştatına ayrılan bəzi federal təhsil fondlarını kəsməyi düşündüyü bildirilib.

ABŞ-da günlərdir davam edən nümayişlər Los-Ancelesdən başqa digər şəhərlərə də yayılıb. Hadisələr bir çox şəhərlərdə baş verib. Polislə vətəndaşlar arasında insident yaşanıb.

Mühacirləri hədəf alan həbs dalğasının ardından etirazların davam etdiyi ABŞ-ın Kaliforniya ştatının Los-Anceles şəhərinin meri Karen Bass açıqlamasında bölgədə yerli fövqəladə vəziyyət və komendant saatı elan etdiyini bildirib. Qadağanın yerli vaxtla saat 20:00-da başlayacaq və 06:00-a qədər davam edəcəyi və şəhər mərkəzində təxminən 2 kilometrlik ərazidə qüvvədə olacağı bildirilir.

Bələdiyyə sədri Karen Bass sosial media hesabında qadağanı pozan insanların həbs ediləcəyini bildirib:

“Los Angeles şəhərinin mərkəzindəki vəziyyəti yaxından izləyirəm və icmalarımızı qorumaq üçün yeni tədbirlər görməyə hazırlaşıram. Prezidentin xaotik eskalasiyasından istifadə edən pis niyyətli aktyorların qarşısını almaq üçün bu axşam saat 20:00-dan başlayaraq Los-Anceles şəhərinin mərkəzində komendant saatı elan etdim. Əgər Los-Ancelesin mərkəzində yaşamır və ya işləmirsinizsə, bu ərazidən uzaq durun. Hüquq-mühafizə orqanları komendant saatını pozan hər kəsi həbs edib mühakimə edəcək".

ABŞ prezidenti Donald Tramp administrasiyasının Kaliforniya ştatına federal təhsilə ayrılan maliyyənin bir hissəsini kəsməyi nəzərdən keçirdiyi bildirilir.

Amerikanın “Politico” jurnalının yazdığına görə, bu məsələ Tramp və Kaliforniya qubernatoru Gavin Nyusom arasında immiqrasiya etirazları və Milli Qvardiyanın Los-Ancelesə göndərilməsi ilə bağlı yaranan gərginlikdən sonra gündəmə gəlib.

Hesabatda Kaliforniyadakı dövlət məktəblərinin hər il təqribən 8 milyard dollar federal maliyyə aldığı və bu resursların aztəminatlı tələbələrin və əlilliyi olan şəxslərin təhsili üçün istifadə edildiyi qeyd edilib.

Tramp administrasiyasının rəsmisi bildirib ki, Konqresin təlimatlarına uyğun olaraq paylanan bəzi federal təhsil dəstəyi nəzərdən keçirilir, lakin hələlik yekun qərar verilməyib. Ağ Ev sözçüsü Kuş Desai mövzu ilə bağlı verdiyi yazılı açıqlamada:

“Heç bir vergi ödəyicisi ölkəmizin çöküşünü maliyyələşdirməyə məcbur edilməməlidir. Lakin Kaliforniya enerjiyə qarşı, cinayətə qarşı, uşaq şikəstliyi və sığınacaq şəhəri siyasətləri ilə bunu edir” - deyə bildirib.

Desai, Tramp administrasiyasının “bu kabusu bitirmək və Kaliforniya xəyalını bərpa etmək əzmində olduğunu” vurğulayaraq, administrasiyanın atacağı mümkün addımlarla bağlı hələ yekun qərarın verilmədiyini əlavə edib.

ABŞ prezidenti Tramp Şimali Karolinadakı Fort Braqqda keçirilən mərasimdə Los-Ancelesdəki hadisələri və cari hadisələri dəyərləndirib.

Tramp Los-Ancelesdəki hadisələrin qəbuledilməz olduğunu və əyalət hökumətinin səriştəsiz olduğu üçün asayişi bərpa etmək üçün hərəkətə keçdiyini bildirib. Nümayişçilərin əksəriyyətinin pul müqabilində zorakılıq hadisələri ilə məşğul olduğunu müdafiə edən Tramp:

"Onlar qürurla başqa ölkələrin bayraqlarını daşıyırlar, amma Amerika bayrağını daşımırlar. Sadəcə onu yandırırlar. Amerika bayrağını yandıranlar bir il həbs cəzası almalıdırlar"-deyə bildirib. Los-Ancelesə minlərlə Milli Mühafizəçi göndərməsə, şəhərin yandırılacağını bildirən Tramp, Kaliforniya qubernatoru Gavin Nyusomun bacarıqsız olduğunu qeyd edib.

Aysel

ABŞ-da münaqişələr səngimir: Los-Ancelesdə komendant saatı elan edilib