Avropanın bu şəhərində müsəlmanlara hücumlar 70 faiz artıb
2024-cü ildə Almaniyanın paytaxtı Berlində müsəlmanlara qarşı hücumlar təxminən 70 faiz artıb.
Sfera.az Anadolu Agentliyinə istinadən xəbər verir ki, Almaniyada fəaliyyət göstərən İslamofobiya və İslamofobiyaya Qarşı Alyansın (CLAIM) hazırladığı hesabatda, 2024-cü ildə Berlində 644 hücum və ayrı-seçkilik hadisəsinin qeydə alındığı bildirilib. Bu, 2023-cü illə müqayisədə təxminən 70 faiz artım deməkdir.
CLAIM-in həmsədri Rima Hanano Berlində keçirilən mətbuat konfransında bu tendensiyanın narahatlıq doğurduğunu bildirib və səlahiyyətliləri anti-müsəlman irqçiliyinə qarşı daha güclü tədbirlər görməyə çağırıb.
"Müsəlmanlara qarşı hücumlar təxminən 70 faiz artıb. Bu o deməkdir ki, Berlində hər gün demək olar ki, iki anti-müsəlman hadisəsi baş verir," - Hanano qeyd edib.
Hücumlarda xüsusilə qadınların hədəf alındığını bildirən Hanano, bəzi qurbanların hadisə zamanı uşaqlarının yanında olduğunu vurğulayıb.
Hesabatda müsəlmanlara qarşı ayrı-seçkiliyin məktəblərdə, yaşayış yerlərində və iş yerlərində ən geniş yayılmış olduğu qeyd edilir. Bundan əlavə, şifahi hücumlar da geniş miqyasda qeydə alınıb.
Hanano, sənədləşdirilmiş halların real hadisələrin yalnız bir hissəsini təşkil etdiyini və əsl rəqəmlərin daha yüksək ola biləcəyini vurğulayıb.
Bu tendensiya Yaxın Şərqdəki qarşıdurmalardan sonra daha da güclənib və Almaniyadakı terror hücumlarından sonra oxşar artımlar müşahidə edilib. Hanano, siyasətçilərin və medianın müsəlmanları təhlükəsizlik təhdidi kimi göstərməsinin şübhə və ayrı-seçkilik mühiti yaratdığını bildirib.
Almaniyada təxminən 5,5 milyon müsəlman yaşayır və ölkə Qərbi Avropada Fransadan sonra ikinci ən böyük müsəlman əhalisinə malikdir.
