KAAN-ın ilk alıcısı bu ölkə olacaq - Ərdoğan açıqladı
Türkiyə KAAN qırıcı təyyarələrinin ixracı üzrə ilk müqaviləni imzalayıb.
Sfera.az-ın türk mediasına istinadən verdiyi xəbərə görə, İndoneziya ilə müqavilənin imzalanmasını ölkənin Prezidenti Rəcəb Tayyib Ərdoğan elan edib.
Ərdoğan bildirib ki, razılaşma çərçivəsində Türkiyə İndoneziyaya 48 ədəd KAAN təyyarəsini tədarük edəcək.
Yerli KİV-in məlumatına görə, saziş İndoneziyadakı INDO Defence 2025 sərgisi çərçivəsində imzalanıb. Sazişin ümumi dəyəri 10 milyard dollar təşkil edəcək.
Beşinci nəsil KAAN qırıcısı türk istehsalı olan ilk milli döyüş təyyarəsidir. Qırıcının təcrübi prototipi ilk uçuşunu 22 fevral 2024-cü ildə həyata keçirib. Seriya istehsalı 2028-ci ilə planlaşdırılıb.
2023-cü ilin iyul ayının sonunda Azərbaycan Müdafiə Sənayesi Nazirliyi və TUSAŞ KAAN layihəsi üzrə əməkdaşlıq protokolu imzalayıblar. Bundan sonra, 2024-cü ilin mart ayında, TUSAŞ-ın keçmiş baş direktoru Temel Kotil KİV-ə bildirib ki, KAAN-ın komponentlərindən biri Azərbaycanda istehsal olunacaq.
