Bu gün Avstriyanın Qrats şəhərində yerli məktəblərindən birində atışma baş verib. 22 yaşlı gənc 8 şagird, 1 müəllimi öldürüb, sonra intihar edib.

Sfera.az xəbər verir ki, daha 30 nəfər yaralanıb, bəzilərinin vəziyyəti ağırdır. Qeyd olunur ki, hücum edən şəxs də bu məktəbdə oxuyub və zorakılıqdan əziyyət çəkib.

Polisin məlumatına görə, hücumçu dərs ilinin bitməsinə üç həftə qalmış beş sinif otağına atəş açıb.

Həlak olanlar beşinci sinifdə oxuyan dörd qız, səkkizinci sinifdə oxuyan üç orta məktəb şagirdi və binanın yaxınlığında öldürülən müəllimdir. Daha bir yaralı isə xəstəxanada dünyasını dəyişib.

Məlum olub ki, hücum edən şəxs özünü zorakılığın qurbanı hesab edən 22 yaşlı bu məktəbin məzunu olub. Cinayətdən sonra polis və “Kobra” bölməsi ona yaxınlaşanda o, məktəbin tualetində intihar edib.

Oğlanın yanında tapança və ov tüfəngi olub. O, silahları cinayətdən az əvvəl alıb.

Onun əvvəllər cinayət əməlinin olmadığı bildirilir.

Bir neçə müəllim də daxil olmaqla 30 nəfər yaralanıb. Hamısı yaxınlıqdakı xəstəxanalara aparılıb. Yaralılardan 4-nün vəziyyəti olduqca ağırdır. İlkin məlumata görə, qurbanlardan bir neçəsi başından güllə yarası alıb.

Şəhər və ətraf rayonlardakı xəstəxanalar dolub.

Polis cinayətin səbəbini rəsmən açıqlamayıb, araşdırmalar davam edir.

Şagirdlər, müəllimlər və valideynlər üçün psixoloji yardım təşkil olunub.

Onu da qeyd edək ki, məktəbə hücum 2015-ci il iyunun 20-də Qratsda üç nəfərin ölümü ilə nəticələnən kütləvi hücumun onuncu ildönümünə az qalmış baş verib.

Aynil

Keçmiş məzun atəş açıb: Çoxlu sayda ölən və yaralananlar var