NATO-nun baş katibi Mark Ruttenin son açıqlamasına görə, Rusiya hazırda bütün NATO ölkələrindən daha çox silah-sursat istehsal edir və beş il ərzində alyansa qarşı hərbi güc tətbiq etməyə hazır ola bilər. Bu bəyanat fonunda, Rusiya ilə NATO arasında gərginliyin artması barədə iddialar gündəmi zəbt edib.

Doğrudanmı müəyyən mərhələdən sonra iki böyük hərbi güc qarşı-qarşıya gələcək?

Məsələ ilə bağlı Sfera.az-a açıqlama verən politoloq Yusif Bağırzadə bildirib ki, Rusiya-NATO münasibətlərindəki gərginliyin kökləri 2008-ci ildə keçirilmiş Buxarest sammitinə dayanır. Həmin sammitdə NATO üzvü olan ölkələr Ukrayna və Gürcüstanın alyansa inteqrasiyasını dəstəkləyən sənəd qəbul etmişdi. Onun sözlərinə görə, bu qərar Rusiyada ciddi narazılıq doğurmuş və münasibətlərin gərgin mərhələyə keçməsinə səbəb olmuşdu.

Politoloq xatırladıb ki, 2014-cü ildə Ukraynada baş vermiş hakimiyyət dəyişikliyindən sonra Avropa yönümlü Petro Poroşenkonun prezident seçilməsi ilə Ukrayna Konstitusiyasında NATO-ya inteqrasiya prioritet kimi təsbit edildi vı bu, Moskvanın narahatlığını daha da artırdı. "2022-ci ildə Rusiyanın Ukraynaya hərbi müdaxiləsi də məhz bu təhlükənin, yəni Ukraynanın NATO-ya daxil olma ehtimalının qarşısını almaq məqsədi ilə izah olunurdu. Rusiya, NATO ilə birbaşa qarşıdurmaya girmək istəmirdi”, – deyə Y.Bağırzadə vurğulayıb.

Ekspert NATO və Rusiyanın hərbi imkanlarını da dəyərləndirib:

“Putinin dediklərində müəyyən həqiqət payı var. ABŞ istisna olmaqla, NATO-ya üzv ölkələrin hərbi istehsal gücü Rusiyanın hazırkı imkanları ilə müqayisədə zəifdir. Amma qeyd edilməlidir ki, Rusiya da Ukrayna ilə müharibədə ciddi resurs itkiləri yaşayıb və hazırda hərbi texnikasının bir hissəsini Şimali Koreya, İran və Çin kimi ölkələrdən təmin edir”.

Y. Bağırzadə həmçinin bildirib ki, hazırda NATO ölkələrinin, xüsusilə də Baltik və Şimal dənizində yerləşən dövlətlərin iştirakı ilə genişmiqyaslı hərbi təlimlər keçirilir:

“Almaniyanın liman şəhərində baş tutan bu təlimlərdə 9 minə yaxın NATO əsgəri iştirak edir. Rusiya bu təlimləri öz təhlükəsizliyi üçün təhdid kimi qiymətləndirir”.

Bununla yanaşı, ABŞ-Rusiya münasibətlərində müəyyən fərqliliklərin də olduğunu deyən politoloq, Prezident Donald Trampın Ukrayna müharibəsi üzrə nümayəndəsi, general Kit Kellogun son bəyanatına diqqət çəkib.

“Kellog bildirib ki, Rusiya-NATO münasibətlərinin gərginləşməsində, Rusiyanın NATO-nu ittiham etməsində müəyyən əsaslar var. NATO, Rusiya sərhədlərinə doğru genişlənməməlidir”, – deyə o qeyd edib.

Sonda politoloq vurğulayıb ki, Rusiya ilə NATO arasında genişmiqyaslı qarşıdurma ehtimalı bu mərhələdə real görünmür. Hazırda tərəflər daha çox mövqelərini möhkəmləndirməyə və siyasi üstünlük qazanmağa çalışırlar.

Bəsti Rəfizadə
Sfera.az

Rusiya-NATO gərginliyi artır: Hərbi toqquşma qaçılmazdırmı? - AÇIQLAMA