Orban: "Macarıstan miqrantların daxil olmaması üçün milyonlarla avro ödəməyə hazırdır"
Macarıstan hakimiyyəti qanunsuz miqrantları ölkəyə buraxmamaq üçün hər gün 1 milyon avro cərimə ödəməyə hazırdır.
Sfera.az-ın məlumatına görə, bunu Macarıstanın Baş naziri Viktor Orban deyib.
"Brüssel təhdid və şantaj edir. Biz maliyyə sanksiyaları altındayıq. Miqrantları ölkəyə buraxmadığımız üçün Brüsselə gündə bir milyon avro ödəməliyik... Gündəlik bir milyon avro bizim üçün çox puldur. Miqrantları içəri buraxmaqdansa, ödənişi üstün tuturuq. Bu pul bizim gələcəyə ən yaxşı sərmayəmizdir", - o bildirib.
V.Orbanın sözlərinə görə, Avropada baş verənlər miqrasiya deyil, mütəşəkkil əhalinin dəyişdirilməsidir ki, onun vasitəsilə qoca qitənin mədəni əsasları dəyişir.
"Ancaq biz macarlar deməliyik ki, yox, biz xalqın tərəfindəyik, onlar üçün mübarizə aparırıq, ailəmiz və Vətənimiz üçün mübarizə aparırıq, hətta Brüsseldə bütün bürokratiya ilə mübarizə aparmalı olsaq da... Biz şəhərlərimiz və küçələrimizin təhlükəsizliyinin dağıdılmasına, mülki vətəndaşların öldürülməsinə icazə vermirik", - hökumət başçısı qeyd edib.
Avropada miqrasiya böhranı başlayandan sonra Macarıstan hakimiyyəti ölkə sərhədlərini keçən miqrant və qaçqınlara qarşı sərt siyasət yeritməyə başlayıb. Buna görə Budapeşt BMT və Aİ-nin humanitar qurumları tərəfindən sərt şəkildə tənqid olunub. 2024-cü ilin iyununda Aİ-nin Lüksemburqdakı Ədalət Məhkəməsi Macarıstanı 200 milyon avro cəriməyə, həmçinin gündəlik 1 milyon avro ödəməyə məhkum edib.
