ABŞ Prezidenti Donald Tramp 12 ölkə vətəndaşlarının ABŞ-yə girişini qadağan edən fərman imzalayıb.

Sfera.az xəbər verir ki, o bu qərarı özünün “TruthSocial” sosial şəbəkəsində elan edib. Ağ Evin saytında da ətraflı press-reliz dərc olunub.

Məlumata görə, ölkələrin siyahısı ABŞ Dövlət Departamentinin yanvar ayından bəri apardığı təhlilə əsaslanır.

Ümumilikdə, 12 ölkə tam, yeddi ölkə isə qismən qadağaya məruz qalıb.

Tam qadağa Əfqanıstan, Myanma, Çad, Konqo Respublikası, Ekvatorial Qvineya, Eritreya, Haiti, İran, Liviya, Somali, Sudan və Yəmənin vətəndaşlarına şamil edilir. ABŞ-nin qanuni daimi sakinləri və etibarlı viza sahibləri üçün istisnalar var.

Burundi, Kuba, Laos, Syerra-Leone, Toqo, Türkmənistan və Venesuela vətəndaşlarına isə qismən qadağa qoyulub. Onlara ziyarətçi və tələbə vizası verilməyəcək.

Donald Trampın sözlərinə görə, belə tədbirlərin tətbiq edilməsinə səbəb Kolorado ştatının Boulder şəhərində yəhudi fəallarına qarşı antisemit hücum olmasıdır. Həyat yoldaşı və uşaqları ilə birlikdə ABŞ-də qeyri-qanuni yaşayan 45 yaşlı Misir vətəndaşı “Fələstinə azadlıq!” qışqıraraq camaatın arasına molotov kokteyli atıb. 15 nəfər, o cümlədən Holokostdan sağ çıxan təqaüdçü yaralanıb.

“21-ci əsrdə biz dünyanın hər yerindən təhlükəli yerlərdən gələn, müddəti bitmiş vizası olan əcnəbilərin törətdiyi terror aktlarını görmüşük və görməkdə davam edirik”, - ABŞ prezidenti bildirib.

Onun sözlərinə görə, ölkədə milyonlarla belə insanlar var.

Terror aktlarından danışan Tramp Avropada baş verənlərin Amerikada baş verməsinə icazə verməyəcəyini bildirib. O qeyd edib ki, qadağa siyahısına daha çox ölkə əlavə oluna bilər.

Firuzə Əliyeva
Sfera.az

Tramp bu ölkə vətəndaşlarına qadağa qoydu - ABŞ-yə girə bilməyəcəklər