Aİ rəsmiləri Ukraynaya görə qorxuya düşdülər
Avropa İttifaqının yüksək vəzifəli məmurları ABŞ-nin Ukraynaya dəstəyi tamamilə geri çəkə biləcəyinə görə daha çox narahatlıq keçirirlər.
Sfera.az “Financial Times" nəşrinə istinadən xəbər verir ki, bu, yalnız maliyyə yardımı ilə məhdudlaşmır. Eyni zamanda kəşfiyyat məlumatlarının mübadiləsinin dayandırılması və Avropa ölkələrinə ABŞ istehsalı olan silahların Kiyevə ötürülməsinə qadağa qoyulması ehtimalı da daxil ola bilər.
Hazırda Aİ və ABŞ arasında üç əsas məsələ ətrafında intensiv danışıqlar gedir: ticarət mübahisələri, NATO-nun müdafiə xərclərinin bölüşdürülməsi və Ukrayna böhranı. Brüsseldəki diplomatik mənbələr bildirirlər ki, Vaşinqton bu mövzularda Aİ-yə təzyiq göstərərək, bir sahədə güzəştə getmək müqabilində digər sahədə güzəşt tələb edə bilər.
Aİ-nin yüksək səviyyəli rəsmiləri bu dialoqlarda ən pis ssenariləri ciddi şəkildə nəzərdən keçirməyə başlayıblar. Onların narahatlıqlarına görə, ABŞ-nin Ukraynaya hər cür dəstəyi kəsməsi, eyni zamanda Avropa dövlətlərinin ABŞ-dan aldığı silahları Ukraynaya ötürməsini qadağan etməsi, qitənin müdafiə strategiyası üçün ciddi təhlükə yarada bilər.
Digər bir ehtimal isə ticarət danışıqlarının nəzarətdən çıxaraq, iqtisadi artıma ciddi zərbə vuran tammiqyaslı ticarət müharibəsinə çevrilməsidir. Bundan əlavə, NATO daxilində müdafiə xərcləri ilə bağlı mövcud fikir ayrılıqları ABŞ qoşunlarının və hərbi avadanlığının Avropadan sürətli çıxarılmasına gətirib çıxara bilər.
Fidan Hacızadə
Sfera.az
