ABŞ-nin tanınmış sahibkarı İlon Mask ABŞ Prezidenti Donald Trampın dəstəklədiyi və Respublikaçılar Partiyasının təqdim etdiyi yeni xərclər haqqında qanun layihəsini kəskin tənqid edib.

Mask bu qanun layihəsini “iyrənc bir eybəcərlik” adlandıraraq, onun ABŞ-nin maliyyə sabitliyinə ciddi zərər verəcəyini bildirib.

İlon Maskın tənqidi Trampla arasında münasibətlərə necə təsir edəcək?

Bununla bağlı Sfera.az-a açıqlama verən politoloq Kazım Kazımov bildirib ki, ABŞ Prezidenti Donald Tramp hakimiyyətə gəldiyi dövrdə İlon Mask tərəfindən açıq şəkildə dəstəklənirdi.

Onun sözlərinə görə, onların hər ikisinin mühafizəkar baxışları və klassik liberal yanaşmaları bir-birinə uyğun gəlib:

“Həm iqtisadi baxımdan, həm də Amerikanın beynəlxalq aləmdəki mövqeyi ilə bağlı ortaq maraqları var idi. Eyni zamanda bir çox sosial məsələlərdə birlikdə fikir mübadiləsi aparırdılar. Lakin bu iki tanınmış şəxsiyyətin ittifaqı uzunömürlü olmadı. İlon Mask bir neçə gün əvvəl bu yolda daha irəliləyə bilməyəcəyini açıqladı və ABŞ Konqresində elan edilən yeni büdcə layihəsinə sosial şəbəkələrdə açıq şəkildə etiraz etməyə başladı”.

Politoloq Maskın narazılığının əsasən büdcə kəsiri ilə bağlı olduğunu vurğulayıb:

Onun fikrincə, artıq ABŞ-nin kifayət qədər borcu var və bu büdcə ilə əlavə 2.5 trilyon dollar həcmində kəsir yarana bilər.

"Bu isə ABŞ xalqını daha da ağır borc yükü altına sala bilər. Digər tərəfdən, büdcə layihəsində sosial proqramlarla xüsusilə tibbi xidmətlər və əhali üçün ərzaq təminatı ilə bağlı sahələrdə ixtisarların aparılması planlaşdırılır. Bu məqam isə demokratların ciddi narazılığına səbəb olub.

Bununla belə, İlon Maskın əsas etirazı sosial güzəştlərin azaldılmasından çox, dövlətin borclanma siyasətinə yönəlib. Trampın təşəbbüsü ilə onun komandasının tərkibində də dəyişikliklər baş verib və bəzi respublikaçılar Konqresdə bu büdcə layihəsinə qarşı çıxıblar”.

Fidan Hacızadə
Sfera.az

Mask Trampın yerinə göz dikib?