Ukraynanın hücumu ABŞ-ni qorxudub - Çin gəmiləri təhlükə mənbəyi ola bilərmi?

Ukraynanın Rusiya şəhərinə həyata keçirdiyi uzun məsafəli PUA (pilotsuz uçuş aparatı) hücumu ABŞ-də ciddi narahatlığa səbəb olub. Hücum, Rusiya hava hücumundan müdafiə sistemlərini keçərək paytaxtın mərkəzinə qədər çatması ilə müdafiə mütəxəssisləri tərəfindən “Rusiyanın Pearl Harboru” kimi qiymətləndirilib.

Sfera.az-ın “NTV”-yə istinadən verdiyi məlumata görə, ABŞ-də ekspertlər bu hadisədən sonra Çinə məxsus yük gəmilərinin potensial təhlükə mənbəyi ola biləcəyini istisna etmirlər.

Müdafiə analitiklərinin fikrincə, Çinə məxsus yük gəmiləri, ABŞ limanlarına daxil olarkən içərisində gizlədilmiş PUA-lar və ya qanadlı raketlər daşıya bilər. Belə texnologiyalar uzaqdan idarəetmə və ya əvvəlcədən qurulmuş zamanlayıcı vasitəsilə aktivləşdirilərək limanlara və digər strateji obyektlərə hücum üçün istifadə olunmaq imkanı var.

Bu ehtimal, ABŞ-nin milli təhlükəsizliyi ilə bağlı yeni suallar doğurur. Mütəxəssislər bildirirlər ki, bu cür təhdidlərə qarşı liman təhlükəsizliyi sistemi yenilənməli, karqo yoxlamaları daha da sərtləşdirilməli və mümkün hücum ssenarilərinə qarşı qabaqlayıcı tədbirlər görülməlidir.

Bəzi analitiklər, bu hadisənin ABŞ-nin Çinlə olan ticarət münasibətlərinə də təsir göstərə biləcəyini düşünürlər. Artıq liman təhlükəsizliyinə dair siyasətlərin yenidən gözdən keçirilməsi və Çin mənşəli gəmilərə daha ciddi nəzarət tətbiq olunması gündəmə gəlib.

Nəticə olaraq, Ukraynanın Moskva üzərində əldə etdiyi PUA uğuru, yalnız Rusiya üçün deyil, ABŞ üçün də siqnal rolunu oynayıb. Ekspertlər ortaya belə bir sual qoyurlar: ABŞ öz limanlarında bu cür texnoloji təhdidlərin qarşısını almağa nə qədər hazırdır?

Bəsti Rəfizadə
Sfera.az