ABŞ Suriyadan çəkilir: "Cəmi bir hərbi baza qalacaq" - Səfir
ABŞ Suriyada hərbi varlığını azaltmaq planı çərçivəsində iki hərbi bazasını bağlayıb.
Sfera.az “Hürriyet”ə istinadən xəbər verir ki, ABŞ-nin Türkiyədəki səfiri və Suriyə üzrə xüsusi nümayəndəsi Tom Barrak, “NTV”yə verdiyi müsahibədə ölkəsinin Suriyadakı hərbi iştirakını azaltdığını təsdiqləyib:
“Əvvəl 8 bazamız var idi, bu say 5-ə, indi isə 3-ə düşdü. Sonda yalnız bir baza qalacaq”.
Pentaqon rəsmiləri aprel ayında verdikləri açıqlamada yaxın aylarda Suriyadakı əsgər sayını 1000 nəfərdən aşağı salacaqlarını bəyan edib, lakin İŞİD-ə qarşı əməliyyatların davam edəcəyini bildirmişdilər.
“Fox News”un xəbərinə görə, son həftələrdə təxminən 500 ABŞ hərbçisi Suriyadan çıxarılıb. ABŞ bu müddətdə iki hərbi bazasını bağlayıb, bir postunu isə tərk edib.
İsrailin “Hayom” qəzetinin yazdığına görə, bölgə sakinləri ABŞ-nin mühəndislik texnikaları ilə birlikdə iki ərazidən çıxışını müşahidə etdiklərini bildiriblər.
Britaniyada yerləşən Suriya İnsan Haqları Müşahidə Qrupu da ABŞ qüvvələrinin iki hərbi obyektin boşaldılması prosesini davam etdirdiyini bildirib. Məlumata görə, ABŞ-nin Suriyadan çəkilmə əməliyyatı ötən ay başlayıb və son iki gündə daha da sürətlənib.
Bəsti Rəfizadə
Sfera.az
