Dünyanın müxtəlif ölkələrindən müqəddəs torpaqlara axışan 1,7 milyon həcc namizədi Məkkədə ibadətlərlə Ərəfat dağı səfərinə hazırlaşır.

Sfera.az “Hürriyet”ə istinadən xəbər verir ki, Səudiyyə Ərəbistanı rəsmiləri hava limanında sərt yoxlamalar apararaq, yalnız “Nusuk” kartı olan şəxsləri Həram bölgəsinə buraxır. Kəbəyə və Məkkənin əsas yollarında da yoxlamalar davam edir.

Məkkədən 25 kilometr məsafədə yerləşən Ərəfat dağına səfər 4 iyun çərşənbə günü başlanacaq. Həcc namizədləri otellərindən avtobuslarla alınıb, kondisionerli və geniş çadırlara yerləşdiriləcək. Xəstələr isə Ərəfat günü təcili yardım maşınları ilə həkim müşayiəti altında aparılacaq.

Temperaturun 45-50 dərəcə arasında olacağı gözlənildiyindən, zəvvarlara günorta saatlarında çölə çıxmamaq tövsiyə edilir. Su və yemək təminatı üçün lazımi tədbirlər görülüb. Ətraf mühitin təmiz saxlanılması üçün çadırların ətrafına zibil qutuları yerləşdirilib.

Ərəfatda səyyar xəstəxana qurularaq tibbi xidmət göstəriləcək. Gecə boyunca dini qruplar tərəfindən vəz, dua və Qurani-Kərim tilavəti təşkil olunacaq.

Həccin əsas mərhələlərinin tamamlanmasının sonra zəvvarlar Mədinəyə və ya Ciddəyə yola düşərək, 7 iyula qədər mərhələli şəkildə vətənlərinə dönəcəklər.

Digər tərəfdən, Məkkədə işçi statusunda olan təxminən 70 min nəfər Kəbəyə daxil ola bilməsələr də, Ərəfat dağına çıxmaq ümidi ilə yaşayırlar. Bu il də keçən il olduğu kimi, Ərəfat dağına yalnız qeydiyyatda olan şəxslərin çıxmasına icazə veriləcək, avtobusların qapıları möhürlənəcək və nəqliyyat vasitələrinə ciddi nəzarət olunacaq.

Bəsti Rəfizadə
Sfera.az

Həcc namizədlərinin Ərəfat dağı səfəri başladı