İstanbulda Rusiya-Ukrayna danışıqları başlayır

Bu gün İstanbulun Çırağan Sarayında Rusiya və Ukrayna nümayəndə heyətləri arasında atəşkəs danışıqları keçiriləcək. Görüşə Türkiyənin Xarici İşlər naziri Hakan Fidan rəhbərlik edəcək. Danışıqlarda Milli Kəşfiyyat Təşkilatının (MİT) rəhbəri İbrahim Kalının da iştirak edəcəyi gözlənilir.

Sfera.az Türkiyə mediasına istinadən xəbər verir ki, Xarici İşlər Nazirliyindən verilən məlumata görə, üçtərəfli – Türkiyə, Rusiya və Ukrayna nümayəndələrinin iştirakı ilə keçiriləcək görüşün saat 13:00-da başlaması planlaşdırılır. Görüş öncəsi Çırağan Sarayında yüksək təhlükəsizlik tədbirləri görülüb.

Rusiya və Ukrayna heyətinə daxil olan nümayəndələr də artıq bilinir. Rusiya tərəfini danışıqlarda Rusiya Prezidentinin köməkçisi Vladimir Medinski, Xarici işlər nazirinin müavini Mixail Qaluzin, Müdafiə nazirinin müavini Aleksandr Fomin, Baş kəşfiyyat idarəsinin rəhbəri İqor Kostyukov təmsil edəcək.

Ukrayna heyəti Müdafiə naziri Rustem Umerovdan, Xarici işlər nazirinin birinci müavini Sergey Kisliçadan, Təhlükəsizlik xidmətinin sədr müavini Oleksandr Pokladdan və Xarici kəşfiyyat xidmətinin rəhbərinin birinci müavini Oleq Luxovskiydən ibarət olacaq.

Danışıqlardan əvvəl Rusiya Xarici İşlər naziri Sergey Lavrov amerikalı həmkarı Marko Rubi ilə telefonla əlaqə saxlayaraq Ukrayna böhranının həlli yollarını müzakirə edib.

İstanbulda keçiriləcək görüş, tərəflər arasında sülhə doğru atılan növbəti diplomatik addım kimi qiymətləndirilir.

Bəsti Rəfizadə
Sfera.az