"Avropa mane olur, Tramp sülh istəyir" - AÇIQLAMA

Ukrayna Rusiyanın strateji bombardmançı təyyarələrin saxlandığı hərbi bazalara hücum edib və 40 dan çox təyyarə məhv edilib. Bu əməliyyat il yarım əvvəldən hazırlanıb. 

Belə əməliyyatların ABŞ-nin razılığı və informasiya dəstəyi olmadan icra etməyin çətin olduğunu bildirən iddialar var. Əməliyyatın danışıqlardan öncə icra edilməsi təsadüfidirmi? Yoxsa bu ABŞ-nin Rusiyaya bir mesajıdır?

Mövcud suallarla bağlı Sfera.az-a açıqlama verən siyasi şərhçi Kənan Novruzov əməliyyatların ABŞ-nin iştirakı olmadan baş tutmasının çətin olmadığını deyib.

Onun sözlərinə görə, əgər Vaşinqton bu prosesdə iştirak etmirsə, Avropanın rolu daha ön plana çıxır və bu ehtimal daha real görünür:

“Çünki ABŞ-dən fərqli olaraq, Avropa münaqişənin sona çatmasını arzulamır. İstanbul danışıqları ərəfəsində baş verən hadisənin arxasında Avropanın dayanması daha məntiqli görünür. Avropa dövlətləri hesab edir ki, əgər müharibə sona çatsa, bu, Rusiyaya həm ərazi baxımından üstünlük qazandıracaq, həm də psixoloji olaraq özünü qalib kimi hiss etməsinə səbəb olacaq. Eyni zamanda bu, Avropanın əsas şəhərləri, xüsusilə də Baltikyanı ölkələr üçün ciddi təhlükə yarada bilər.
Bu səbəbdən də Avropa dövlətləri düşünür ki, münaqişə nə qədər uzun çəkərsə, bir o qədər də təhlükəsizlik təmin olunmuş olur, ən azından Moskva zəifləyənədək”. 

Müsahibimiz nəticə etibarilə Avropa ölkələrinin Vaşinqtonun danışıqlar təşəbbüsünü əngəlləməyə çalışdığını qeyd edib. 

O bildirib ki, ABŞ isə əksinə, münaqişənin başa çatmasında maraqlıdır:

“Çünki döyüşlər bitdikdən sonra Ukraynaya sərmayə yatırmaq planları var. Bununla yanaşı, Rusiya ilə münasibətləri daha da gərginləşdirmək niyyətində deyil. Son mərhələdə isə ABŞ diqqətini Şərqi Avropadakı müharibə bitəndən sonra Yaxın Şərqə yönəltmək istəyir. Hazırkı vəziyyətdə Avropa ilə ABŞ arasında baxış fərqləri açıq şəkildə görünür. Avropa tərəfi danışıqların uğurla nəticələnməsinin qarşısını almağa cəhd edir. Məhz bu məqamda baş tutan əməliyyat danışıqlar prosesinə ciddi zərbə vurdu və uğurlu nəticə ehtimalını əhəmiyyətli dərəcədə azaltdı. Rusiya isə bu əməliyyata cavab verməyə məcbur olacaq- istəsə də, istəməsə də. Əgər cavab verməzsə, bu, onun nüfuzuna ağır zərbə ola bilər”.

K.Novruzov vurğulayıb ki, mövcud mərhələdə münaqişənin genişlənməsi ehtimalı, onun bitməsi perspektivindən daha yüksəkdir:

“Son zamanlar Vaşinqton Moskva ilə müəyyən siqnallar vasitəsilə ünsiyyət qurmağa çalışır. Lakin görünən odur ki, Kreml hələ də Ağ Evin təkliflərini qəbul etməyə hazır deyil. Hətta bu yaxınlarda ABŞ-nin Prezidenti Donald Tramp bəyan edib ki, Rusiya “odla oynayır”, çünki ABŞ elə tələblər irəli sürür ki, Moskva onları qəbul etmir".

Fidan  Hacızadə
Sfera.az