Çinin kosmik ambisiyaları bitmir: Yeni raket uğurla sınaqdan keçdi - FOTO

Çinli özəl kosmik şirkət “Space Epoch”, təkrar istifadə oluna bilən maye yanacaqlı raketini uğurla sınaqdan keçirib. Bu hadisə ölkənin kosmik texnologiyalar sahəsində mühüm bir irəliləyişə imza atdığını göstərir.

Sfera.az “Sözcü”yə istinadən xəbər verir ki, şirkət tərəfindən verilən məlumata görə, “Yuanxingzhe-1” adlı raket Şandunq əyaləti sahillərindəki dəniz üzərində yerləşən platformadan buraxılıb.

Raket təxminən 2,5 kilometr hündürlüyə qalxdıqdan sonra mühərriklərini qısa müddətə söndürüb, daha sonra yenidən işə salaraq nəzarətli şəkildə dənizə eniş edib.

Cəmi 125 saniyə davam edən test zamanı raketin eniş mərhələsində mühərrikləri yenidən işə salması, şaquli qalxma və eniş (VTVL) texnologiyasının uğurla tətbiq edildiyini göstərib. Bu texnologiya uzun illərdir ABŞ-nin “SpaceX” şirkəti tərəfindən istifadə olunur.

“Space Epoch” nümayəndələri bu sınağı “təkrar istifadə oluna bilən raket texnologiyalarının inkişafı baxımından böyük addım” adlandırıb. Qeyd edək ki, ötən il başqa bir Çinli şirkət olan “LandSpace” də 10 kilometr hündürlüyündə bənzər test həyata keçirmişdi.

Ekspertlərə görə, bu cür uğurlar Çin-in kosmos sahəsində ABŞ-ni yaxalamaq səylərinin tərkib hissəsidir və ölkənin kosmik yarışda iddialı olduğunu göstərir.

Bəsti Rəfizadə
Sfera.az