Şahzadədən xəbərdarlıq: “Ya Trampla anlaş, ya da hücuma hazır ol”
Səudiyyə Ərəbistanının müdafiə naziri şahzadə Xalid bin Salman, aprel ayında İrana etdiyi səfər zamanı Tehran rəhbərliyinə ABŞ Prezidenti Donald Trampın nüvə razılaşması təklifini diqqətlə nəzərdən keçirmələri üçün birbaşa xəbərdarlıq edib. O, diplomatik anlaşmanın hərbi eskalasiyadan daha üstün olduğunu vurğulayaraq, danışıqlara dair zamanın daraldığını qeyd edib.
Sfera.az xəbər verir ki, şahzadə Xalid bin Salman Kral Salmanın mesajını çatdırmaq üçün 17 aprel tarixində Tehran rəsmiləri ilə görüşüb.
Toplantıda İran Prezidenti Məsud Pezeşkiyan, Baş Qərargah rəisi Məhəmməd Baqiri və Xarici İşlər naziri Abbas Ərakçi iştirak ediblər. Görüşdə səsləndirilən mesaj İranın İsraillə mümkün hərbi qarşıdurmadan yayınması üçün diplomatik fürsət kimi dəyərləndirilib.
Şahzadənin səfərindən bir neçə gün əvvəl Donald Tramp birbaşa Tehranla danışıqların başladığını açıqlayıb. Bu bəyanat Vaşinqtonda İsrail Baş naziri Binyamin Netanyahu ilə görüş zamanı verilib. Netanyahu İranın nüvə proqramı ilə bağlı sərt mövqe gözlədiyi halda, Tramp diplomatiyanı üstün tutaraq danışıqları gücləndirmək istəyini vurğulayıb.
Tehrandakı görüşdə Xalid bin Salman Tramp administrasiyasının səbrinin məhdud olduğunu və danışıqların tezliklə nəticə verməsinin vacibliyini vurğulayıb. O, “ABŞ ilə razılaşmaq, uğursuz danışıqlardan sonra İsrail hücumu riskindən daha yaxşıdır,” – deyə əlavə edib.
İran tərəfi iqtisadi təzyiqləri azaltmaq məqsədilə danışıqlara açıq olduğunu bildirsə də, Tramp administrasiyasının qeyri-sabit davranışlarından ehtiyat etdiyini vurğulayıb. İran rəsmiləri uranyum zənginləşdirmə məsələsində ABŞ-ın mütəmadi dəyişən yanaşmasının Tehran üçün etimad sarsıdıcı olduğunu bildiriblər.
Prezident Məsud Pezeşkiyan isə görüş zamanı Tehranın nüvə proqramı üzrə razılaşmaya müsbət yanaşdığını, lakin strateji balansı qorumaq üçün uranyum zənginləşdirmə fəaliyyətindən tamamilə imtina etməyəcəyini bəyan edib.
Səudiyyə Ərəbistanı ilə İran arasındakı bu yüksək səviyyəli birbaşa mesajlaşma regionda diplomatik dinamikanı gücləndirir. Tramp administrasiyasının danışıqlar təşəbbüsü və Netanyahu ilə paralel səhnədə apardığı siyasət isə bölgədəki balansı daha da həssas vəziyyətə salır.
Bəsti Rəfizadə
Sfera.az
