ABŞ-də təhsil almaq çətinləşəcək - Viza tələbləri sərtləşdirilir
ABŞ-nin Xarici İşlər naziri Marco Rubio Çindən olan tələbələrin vizalarının ləğv ediləcəyini açıqlayıb. Yeni qərar bütün tələbələri yox, Çin Kommunist Partiyası ilə əlaqəsi olan və ya strateji sahələrdə təhsil alan tələbələri hədəf alacaq.
Sfera.az xarici mediaya istinadən xəbər verir ki, Rubio Çindən olan tələbələrin vizalarının geri alınacağını və bütün yeni viza müraciətlərinin daha sıx yoxlanacağını bildirib.
Bu qərarın səbəbi ABŞ kəşfiyyat orqanlarının Çinli tələbələrin casusluq məqsədilə təhsil alma ehtimallarına dair uzun müddətdir ki, irəli sürdüyü şübhələrdir.
2019-cu ildə qəbul ediən “Çin cəhdi” adlı mühafizə proqramına əsasən, ABŞ-nin universitetlərində təhsil alan Çinli tələbələrə qarşı mühafizə tədbirləri artırılıb. 2023-24-cü təhsil ilində ABŞ-də təhsil alan xarici tələbələrin dörddə birinin Çindən olan tələbələr olduğu məlum olub. Beynəlxalq Təhsil İnstitutunun məlumatına görə, ABŞ-yə ən çox tələbə göndərən ikinci ölkə Çin olub, bu rəqəm 280 minə yaxındır.
Çin Xarici İşlər Nazirliyi ABŞ-yə müraciət edərək, çinli tələbələr də daxil olmaqla, bütün beynəlxalq tələbələrin hüquqlarının qorunmasını tələb edib. Yeni viza məhdudiyyətləri yalnız Çinli tələbələr üçün deyil, həm də digər xarici tələbələr üçün narahatlıq doğurub. Bu addımlar Donald Trampın elit universitetlərə qarşı başladığı mübarizənin bir parçası olaraq görülür.
Bəsti Rəfizadə
Sfera.az
