Robotlar arasında döyüş yarışı keçirildi - FOTOLAR
Çinin Hançjou şəhərində keçirilən Dünya Robot Yarışmasında ilk dəfə olaraq insanabənzər robotlar arasında döyüş yarışı təşkil edilib.
Sfera.az türk mediasına istinadən xəbər verir ki, müsabiqədə "Unitree Robotics" şirkətinin hazırladığı dörd G1 modeli robot iştirak edib. Təxminən 35 kiloqram çəkisi və 132 santimetr boyu olan bu robotlar insan “təlimçiləri” tərəfindən uzaqdan idarə olunaraq rinqə daxil olublar.
Döyüş iki mərhələdən ibarət olub. Robotlar rəqiblərinin baş və bədən nahiyələrinə yumruq və təpik zərbələri endirərək xal toplamağa çalışıblar. Qaydalar üzrə bir yumruq bir xal, bir təpik üç xal qazandırıb. Döyüş zamanı yerə yıxılan robotlar isə beş xal itiriblər.
Yarışma görüntülərində robotların hərəkətlərinin axıcı, lakin zərbələrinin təsir gücünün zəif olduğu müşahidə edilib. Bununla belə, onların koordinasiyalı və mayevari hərəkətləri tamaşaçılar tərəfindən maraqla qarşılanıb. Bəzi robotlar döyüş zamanı müvazinətlərini itirərək yerə yıxılsa da, əksəriyyəti qısa müddətdə ayağa qalxmağı bacarıb.
“Unitree Robotics”in baş direktoru Vanq Qixin bildirib ki, robotlara döyüş hərəkətləri süni intellekt texnologiyası vasitəsilə öyrədilib. Bu hərəkətlər peşəkar idmançıların məlumatları əsasında virtual mühitdə modelləşdirilib.
Zhejiang Universitetinin tədqiqatçısı Li Gaofeng qeyd edib ki, Çin son altı ayda insanabənzər robot texnologiyasında əhəmiyyətli irəliləyiş əldə edib və bu inkişaf yarışda da öz əksini tapıb. Onun sözlərinə görə, belə yarışlar yalnız əyləncə məqsədi daşımır. Robotlar döyüş əsnasında bir-birindən öyrənir, tədqiqatçılar isə bu prosesləri analiz edərək gələcək inkişaf istiqamətlərini müəyyənləşdirirlər.
Mütəxəssislər hesab edirlər ki, döyüş kimi yüksək koordinasiya və reaksiya tələb edən ssenarilər robotların elektron komponentləri və idarəetmə alqoritmləri üçün ideal sınaq meydanıdır. Sənaye analitiklərinin fikrincə, bu cür yarışlar Çinin sürətlə inkişaf edən robot texnologiyasında sensorlar, reaksiya mexanizmləri və idarəetmə sistemləri sahəsində innovasiyalara güclü təkan verəcək.
Fidan Hacızadə
Sfera.az
