Ukraynanın bu əməliyyatı Rusiyanı qorxudub - Bufer zona yaradılacaq

Rusiya Prezidenti Vladimir Putin  Rusiya-Ukrayna sərhədi boyunca “təhlükəsizlik bufer zonası” yaradılması barədə göstəriş verdiyini açıqlayıb. Bu qərar, xüsusilə Kursk, Belqorod və Bryansk vilayətlərində Ukrayna tərəfindən həyata keçirilən hücumların qarşısını almaq məqsədi daşıyır. 

Bəs bu zona indiki halda necə yaradılacaq?  Rusiya sərhəddə daha çox texnika və əsgər yığacaq?

Sfera.az-a açıqlama verən politoloq Kazım Kazımov bufet zona ideyasının yaranmasının birbaşa Rusiya Prezidenti Vladimir Putinin göstərişi ilə bağlı olduğunu deyib. 

Politoloq bildirib ki, o, müşavirə zamanı belə bir ifadə işlətmişdi:

"“Ukrayna sərhədində bufer zona yaradılacaq”. Bu qərarın əsas səbəbi 2024-cü ildə baş verən Kursk basqını idi. Həmin il Ukrayna Silahlı Qüvvələri Kursk vilayətinə hərbi əməliyyat həyata keçirmiş və ərazinin bir hissəsini nəzarətə götürmüşdü. Bu hadisə Rusiya üçün həm gözlənilməz olmuşdu, həm də həmin ərazini geri qaytarmaq üçün ölkə bir ildən artıq zaman və böyük miqdarda resurs sərf etmək məcburiyyətində qalmışdı. Kursk yalnız bir ay öncə yenidən Rusiya nəzarətinə qaytarılıb”.

K.Kazımov bu cür ani hücumların qarşısını almaq üçün Rusiya tərəfindən yeni strateji tədbirlərin görüləcəyi ehtimal olunduğunu qeyd edib. 
Onun sözlərinə görə, tarixdə buna bənzər nümunələr çox olub:

“Qədim dövrlərdə Çin səddi, 1920-ci illərdə Fransanın Magino xətti və digər oxşar bufer zonalar. Bu cür müdafiə sistemləri bəzən effektiv, bəzən isə nəticəsiz olub. Rusiyanın quracağı bufer zonanın nə dərəcədə səmərəli olacağı isə zamanla bəlli olacaq. Gözlənilir ki, bu ərazidə fiziki maneə rolunu oynayan mühəndis qurğular inşa olunacaq, əlavə hərbi qüvvələr cəlb ediləcək, ağır texnika yerləşdiriləcək və yüngül silahlı birliklərin sayı artırılacaq. Həmçinin, həyəcan siqnallarının daha operativ şəkildə ötürülməsi üçün texnoloji qurğuların bölgədə yayılması da prioritet olacaq”.

Müsahibimiz Rusiya-Ukrayna müharibəsi davam etdiyi müddətdə hər iki tərəfin qabaqlayıcı və profilaktik tədbirlər görməsinin əhəmiyyətli nəticə verməyəcəyini vurğulayıb:

“Əgər Rusiya Ukrayna ərazisində hərbi əməliyyatları fəal şəkildə davam etdirirsə, bu, Ukrayna ordusunun da eyni şəkildə cavab vermək haqqını saxladığını göstərir. Kursk hadisəsində olduğu kimi. Bu baxımdan hesab edirəm ki, ən yaxşı bufer zona sülhün özüdür”.

Fidan Hacızadə
Sfera.az