Trampın qanun layihəsi ABŞ-ni iki yerə böldü

Donald Trampın “böyük, möhtəşəm qanun layihəsi” adlandırdığı yeni vergi və xərclər paketi Nümayəndələr Palatasında qəbul olunub. Lakin sənəd həm Konqresdə, həm də ictimaiyyətdə ciddi narazılığa səbəb olub.

Sfera.az xarici mediaya istinadən xəbər verir ki, təklif olunan qanun layihəsi, 2017-ci ildən tətbiq olunan vergi endirimlərinin müddətinin uzadılmasını nəzərdə tutur.

Layihədə eyni zamanda, əlavə gəlirləri və avtomobil kreditləri üçün yeni vergi güzəştləri təqdim olunur. Yaşıl enerji sahəsində verilən subsidiyaların bir hissəsi dayandırılır, əvəzində ordu və immiqrasiya siyasəti üçün əlavə maliyyə ayrılır.

Ən çox tənqid olunan məqam isə aşağı gəlirli amerikalılar üçün nəzərdə tutulan sosial yardım proqramlarına, xüsusilə də qida və səhiyyə xidmətlərinə çıxış imkanlarının məhdudlaşdırılmasıdır.

Partiyalarüstü Konqres Büdcə İdarəsinin (CBO) məlumatına görə, bu qanun layihəsi ABŞ dövlət borcuna növbəti on il ərzində 3,8 trilyon dollar əlavə yük gətirəcək. 
Qanun layihəsinin qəbulu zamanı Nümayəndələr Palatasında həm alqış səsləri, həm də etirazlar eşidilib. Bu isə layihənin ABŞ cəmiyyətində və siyasi arenada dərin bölünməyə səbəb olduğunu bir daha nümayiş etdirir.

Bəsti Rəfizadə
Sfera.az