Rusiya müharibədə ölən dinc sakinlərin sayını açıqladı
Rusiya İstintaq Komitəsinin sədri Aleksandr Bastrıkin 2022-ci ilin fevral ayında başlayan Rusiya-Ukrayna müharibəsindən bəri Ukraynanın hücumları nəticəsində azı 621 rusiyalı dinc sakinin həyatını itirdiyini açıqlayıb. Onların arasında 38 uşağın da olduğu bildirilir.
Sfera.az xarici mediaya istinadən xəbər verir ki, Bastrıkinin sözlərinə görə, Ukrayna qüvvələrinin Rusiya ərazilərinə həyata keçirdiyi hücumlar mülki infrastrukturun dağıdılmasına və insan tələfatına səbəb olub. Rəsmi məlumata görə, hücumlar nəticəsində 3 min 217 nəfər də yaralanıb.
“The Moscow Times” nəşrinin xəbərinə görə, Rusiya İstintaq Komitəsi Ukraynanın sərhədyanı bölgələrə yönəltdiyi hücumlarla bağlı 3 mindən çox cinayət işi başladıb.
Bastrıkin hücumların əsasən Belqorod, Kursk, Bryansk, Rostov, Krasnodar vilayətləri ilə yanaşı, Krım və Sevastopolda qeydə alındığını bildirib.
Komitə sədri əlavə edib ki, indiyədək 550-yə yaxın Ukrayna hərbçisi və xarici muzdlular uzunmüddətli həbs cəzalarına məhkum olunub.
Bəsti Rəfizadə
Sfera.az
