İran ABŞ-nin tələbini rədd etdi: “Nüvə proqramı dayandırılmayacaq"

İran Xarici İşlər Nazirliyinin sözçüsü İsmayıl Bəqai Tehranda keçirdiyi mətbuat konfransında ölkəsinin nüvə proqramı və beynəlxalq danışıqlarla bağlı mühüm açıqlamalar verib. O bildirib ki, İran uranın zənginləşdirmə fəaliyyətini dayandırmayacaq və bu texnologiyanın ölkənin nüvə sənayesi üçün zəruri olduğunu vurğulayıb.

Sfera.az xarici mediaya nistinadən xəbər verir ki, Bəqai qeyd edib ki, İran daha şəffaf olmaq və beynəlxalq ictimaiyyətə daha çox təminat vermək məqsədilə nəzarət mexanizmlərinin artırılmasına hazırdır.

Lakin ABŞ-nin zənginləşdirmə fəaliyyətinin tamamilə dayandırılması tələbinin qəbuledilməz olduğunu bildirib.

“Uranın zənginləşdirməsi dayandırıla biləcək bir fəaliyyət deyil. Bu, İranın texnoloji inkişafı və hüquqi haqqıdır. Bu fəaliyyətə son qoymaq bizim üçün mümkün deyil”, – deyə Bəqai vurğulayıb.

ABŞ ilə aparılan danışıqlarda qarşı tərəfin verdiyi bəyanatlarla masa arxasında dedikləri arasında uyğunsuzluq olduğunu deyən sözçü yazılı heç bir razılaşma əldə olunmadığını da əlavə edib.

Gələcək danışıqlar turunun vaxtı hələ müəyyən edilməyib. Bəqai bu qeyri-müəyyənliyin səbəbi kimi ABŞ-nin ziddiyyətli və dəyişkən mövqeyini göstərib.
O həmçinin İsrailin İran-ABŞ danışıqlarına təxribatla müdaxilə edə biləcəyi barədə xəbərdarlıq edib:

“İsrail gələcəkdə İranı ittiham etmək və bölgədə qarşıdurma üçün bəhanə yaratmaq məqsədilə təxribatlara əl ata bilər”.

Avropa ölkələrinin BMT sanksiyalarını yenidən tətbiq edə biləcəyi ilə bağlı fikirlərə də münasibət bildirən Bəqai bu cür addımların beynəlxalq hüquqa uyğun olmadığını və proqramın tamamilə dinc məqsədli olduğunu vurğulayıb:

“Heç bir haqsız və dost olmayan addım cavabsız qalmayacaq”.

Bəsti Rəfizadə
Sfera.az