Şimali Koreya Panmuncomda dəyişiklik etdi - Düşmənçilik dərinləşir

Koreya respublikaları arasında münasibətlərin gərginləşdiyi bir vaxtda Şimali Koreya simvolik addım ataraq Panmuncom kəndində yerləşən binanın adından “birləşmə” ifadəsini çıxarıb. 

Sfera.az xarici mediaya istinadən xəbər verir ki, bu barədə Cənubi Koreya Birləşmə Nazirliyi məlumat yayıb.

Nazirliyin sözçüsü Ku Byonq Sam bildirib ki, ötən ilin avqustunda Şimali Koreya Panmuncomun öz nəzarətində olan hissəsində yerləşən və əvvəllər “Birləşmə Pavilyonu” adlanan binanın lövhəsini sökərək yeni adı - “Panmun Salonu”nu sözlərini yerləşdirib.

Bu dəyişiklik Pxenyanın Seulla münasibətləri “düşməncəsinə” yenidən qiymətləndirməsi istiqamətində apardığı siyasətin tərkib hissəsi kimi qiymətləndirilib.
Panmuncom kəndi, 1953-cü ildə Koreya müharibəsinə son qoyan Atəşkəs Sazişinin imzalandığı ərazidir. Adı dəyişdirilən bina uzun illər boyunca koreyalararası dialoqlar üçün istifadə olunub. 2018-ci ilin mayında Şimali Koreya lideri Kim Çen In və Cənubi Koreyanın o zamankı prezidenti Mun Ce In burada ikinci sammitlərini keçirmişdilər.

Qeyd edək ki, 2023-cü ildə Kim Çen In Cənubi Koreyanı ölkəsinin “əsas düşməni” elan etmişdi.

Bəsti Rəfizadə
Sfera.az