ABŞ administrasiyası Rusiya-Ukrayna münaqişəsinin həlli istiqamətində irəliləyiş əldə olunmayacağı təqdirdə Moskvaya qarşı indiyədək tətbiq olunmamış, daha sərt iqtisadi və siyasi sanksiyaların gündəmə gətiriləcəyini açıqlayıb. Vaşinqtonun bu xəbərdarlığı fonunda beynəlxalq ictimaiyyətin diqqəti Rusiyanın verə biləcəyi mümkün cavablara və vəziyyətin gələcək inkişaf ssenarilərinə yönəlib.

Mövzu ilə bağlı Sfera.az-a açıqlama verən Azərbaycan Yəhudi Media Mərkəzinin politoloqu Rüstəm Tağızadə bildirib ki, Ukrayna müharibəsində atəşkəs əldə olunmasa da, döyüşlərin intensivliyi nisbətən azalıb.

Onun fikrincə, ABŞ-nin Rusiya əleyhinə yeni sanksiyalar tətbiq etmə ehtimalı olsa da, bu proses bir qədər ehtiyatla və mərhələli şəkildə aparılacaq:

“Donald Trampın ritorikası fərqli olduğu üçün bəzi hallarda ABŞ-nin Rusiya ilə bağlı mövqeyi dəyişə bilər. Bununla belə, Rusiya indiyədək bank sektoru, enerji və hərbi sənaye sahələri də daxil olmaqla, bir çox istiqamətlərdə ağır sanksiyalarla üzləşib. Yeni sanksiyalar tətbiq olunarsa, onlar Rusiyanın iqtisadiyyatına əlavə təzyiqlər yaradacaq”.

R.Tağızadə əlavə edib ki, Rusiya bu sanksiyaların təsirini azaltmaq və onları aradan qaldırmaq üçün müxtəlif diplomatik və iqtisadi təşəbbüslərlə çıxış edir:

"Moskva Avropa ölkələri ilə enerji əməkdaşlığını bərpa etməyə çalışır, çünki bir sıra Avropa dövlətləri artıq Rusiya qazından imtina edib. Rusiyanın məqsədi, enerji resurslarını sataraq iqtisadiyyatını dirçəltmək və müəyyən qədər Avropa ölkələrini yenidən öz orbitinə qaytarmaqdır. ABŞ isə Rusiyanı bu məsələlərdə sıxışdıraraq Ukrayna münaqişəsində güzəştə getməyə məcbur etmək niyyətindədir. Lakin Rusiyanın cavabı sərt və ölçülü ola bilər, çünki o, həm iqtisadi, həm də geosiyasi maraqlarını qorumağa çalışır”, – deyə politoloq vurğulayıb.

Ekspert həmçinin qeyd edib ki, Rusiya donanmasına qarşı da sanksiyalar tətbiq olunub və gələcəkdə bu tip məhdudiyyətlərin sayının artması istisna edilmir.
Politoloq bildirib ki, bu kimi təzyiqlər fonunda Rusiyanın kompromisə gəlməsi üçün daha effektiv addımlar yalnız beynəlxalq diplomatik təzyiqin gücləndirilməsi və enerji asılılığının azaldılması ilə mümkün ola bilər.

Bəsti Rəfizadə
Sfera.az

Rusiya ABŞ-nin təzyiqlərinə tab gətirəcəkmi? - "Artıq döyüşlərin intensivliyi azalıb"