Hakan Fidan Fransa və ABŞ rəsmiləri ilə danışdı
Türkiyənin xarici işlər naziri Hakan Fidan İstanbulda ABŞ dövlət katibi Marko Rubio və Fransanın xarici işlər naziri Jan Noel Baron ilə telefon danışığı zamanı Moskva və Kiyev nümayəndələri arasında mümkün danışıqları müzakirə edib.
Sfera.az xarici mediaya istinadən xəbər verir ki, telefon danışığı zamanı Fidan və Rubio mayın 15-də İstanbulda keçirilməsi planlaşdırılan Rusiya–Ukrayna danışıqları ilə bağlı fikir mübadiləsi aparıblar. Eyni zamanda, Rubionun Türkiyəyə gözlənilən səfəri də gündəmə gəlib. Səfərin NATO xarici işlər nazirlərinin mayın 14-dən 15-dək Antalyada keçiriləcək qeyri-rəsmi görüşü çərçivəsində reallaşacağı bildirilib.
Daha sonra Fidan fransalı həmkarı Jan Noel Baron ilə də telefon əlaqəsi yaradıb. "Daily Sabah" qəzetinin yazdığına görə, söhbət zamanı əsas diqqət Ukraynadakı münaqişənin sülh yolu ilə həllinə yönəlib.
Qeyd edək ki, bir gün əvvəl Rusiya Xarici İşlər Nazirliyi məlumat yayaraq Rusiya xarici işlər naziri Sergey Lavrovun Hakan Fidanla prezident Vladimir Putinin Ukrayna ilə birbaşa danışıqların bərpası təklifini müzakirə etdiyini açıqlayıb. Məlumata görə, Putin mayın 15-də İstanbulda Ukrayna ilə kəsilmiş danışıqların yenidən başlamasını təklif edib.
Fidan Hacızadə
Sfera.az
