Çin rabitə peykini kosmosa göndərdi - FOTO
Çin yeni rabitə texnologiyalarını sınaqdan keçirmək üçün nəzərdə tutulmuş test peykini bu gün kosmosa buraxıb. Peyk Pekin vaxtı ilə saat 02:09-da Siçanq Peyk Buraxılış Mərkəzindən “Uzun Yürüş-3C” raketi ilə uğurla orbitə göndərilib və planlaşdırılan orbitə yerləşdirilib.
Sfera.az xarici mediaya istinadən xəbər verir ki, bu peyk çoxzolaqlı və yüksək sürətli rabitə texnologiyalarının sınaqdan keçirilməsi üçün istifadə olunacaq.
Bu buraxılış “Uzun Yürüş” raket seriyasının 575-ci missiyası kimi qeydə alınıb.
Qeyd edək ki, Çinin kosmik proqramının əsası 1950-ci illərdə Sovet İttifaqının dəstəyi ilə qoyulub. 1970-ci ildə “Uzun Yürüş-1” raketi ilə ilk peyki olan “Dong Fang Hong I”i orbitə yerləşdirən Çin, kosmosa peyk göndərən beşinci ölkə olub.
Hazırda Çin dünyanın ən aktiv kosmik proqramlarından birinə malikdir. Ölkə “Uzun Yürüş” raketləri və Ciuçüan, Tayyuan, Siçanq və Vençanq kosmodromları vasitəsilə hər il ən çox orbitə peyk buraxan ölkələr arasında yer alır. Çin həmçinin rabitə, naviqasiya, məsafədən müşahidə və elmi tədqiqatlar üçün geniş peyk donanması idarə edir və kosmik fəaliyyətlərini Yer orbitindən Ay və Marsa qədər genişləndirib.
Bununla yanaşı, Çin ABŞ və Rusiya ilə birlikdə müstəqil şəkildə insanlı kosmik uçuş həyata keçirə bilən üç ölkədən biridir.
Bəsti Rəfizadə
Sfera.az
