Çin istehsalı Pakistan təyyarələri ilə (J-10) Fransa istehsalı Hindistan təyyarələri (“Rafael”) arasında hava döyüşü dünyanın diqqətini çəkib. Çinin yüksək dəqiqlikli silahları mütəxəssislər tərəfindən araşdırılır.

Sfera.az Teleqraf-a istinadən xəbər verir ki, bu barədə “Reuters” agentliyi ABŞ rəsmilərinə istinadla məlumat yayıb.

Pakistan qırıcısı mayın 8-də 5 Hindistan hərbi təyyarəsini vurub. Vurulan Hindistan təyyarələrindən 3-ü Fransa istehsalı “Rafale”dir. Qeyd edilir ki, bu, qabaqcıl Çin qırıcısı üçün potensial bir mərhələdir.

ABŞ rəsmisinin sözlərinə görə, Pakistanın Hindistan təyyarələrinə qarşı hava-hava tipli raketlər atmaq üçün Çin istehsalı J-10-dan istifadə etdiyinə böyük inam var.

Pakistan müdafiə naziri Xavaca Asif mayın 8-də “Reuters”ə bildirib ki, Hindistanın bu yaxınlarda aldığı üç “Rafale” qırıcısının vurulması üçün J-10 təyyarəsindən istifadə edilib.

Pakistanın Hindistan hədəflərinin vurulmasında Çin Hərbi Hava Qüvvələri tərəfindən istifadə edilən BL-15 raketlərindən istifadə etdiyi də bildirilib.

Mütəxəssislər deyirlər ki, qabaqcıl silahların, xüsusilə də döyüş təyyarələrinin faktiki istifadəsi Tayvan və ya Hind-Sakit okean bölgəsində mümkün münaqişəyə hazırlaşan ABŞ və digər ölkələri silahlarını yenidən təhlil etməyə məcbur edəcək.

“Defense Express”in mayın 8-də mənbələrə istinadla yaydığı məlumata deyilirdi ki, Pakistan Hindistanın hədəflərinə qarşı Çinin J-10C döyüş təyyarəsinin daşıdığı yeni uzaqmənzilli PL-15E raketi və JF-17 qırıcılarından da istifadə edib.

Xatırladaq ki, Azərbaycan ötən il Pakistandan aldığı JF-17 qırıcılarını öz inventarına daxil edib. JF-17 Çin və Pakistanın birgə istehsal etdiyi dördüncü nəsil qırıcıdır.

Pakistanın istifadə etdiyi silahlar diqqət mərkəzində - Bəzilərindən Azərbaycanda da var