İran 120 kilometr mənzilə malik “Fath-36” raket sistemlərini yaxın günlərdə Rusiyaya təhvil verməyə hazırlaşır. Bu raketlər Ukrayna müharibəsində istifadə olunacaq yeni silahların əsasını təşkil edə bilər.

Sfera.az xəbər verir ki, “Reuters” agentliyinin məlumatına görə, “Fath-360” buraxılış qurğularının göndərilməsi, Rusiyanın Ukraynaya qarşı hücumlarını gücləndirməyə kömək edəcək və Moskva ilə Tehran arasında dərinləşən təhlükəsizlik əlaqələrini bir daha təsdiqləyəcək.

Analitiklərin fikrincə, bu silahlar Rusiyaya Ukrayna cəbhəsindəki hərbi hədəflərə və sərhədə yaxın yaşayış məntəqələrinə qarşı dəqiq zərbələr endirmək imkanı verəcək. Bu da döyüş bölgəsində balansı dəyişə bilər.

ABŞ ötən ilin sentyabrında İranın raketləri Rusiya bayrağı altında üzən 9 gəmi ilə göndərdiyini açıqlamışdı. Lakin o zaman bu raketlərin buraxılış qurğularının daxil olmadığı bildirilmişdi. İndi isə Qərb təhlükəsizlik mənbələri və regional rəsmilər bu qurğuların da yaxın zamanda çatdırılacağını deyirlər.

Rusiya və İran daha əvvəl Moskvanın 2022-ci ilin fevralında başladığı Ukrayna işğalına yardım məqsədilə raket və ya başqa silah göndərildiyini inkar etmişdi. Lakin ABŞ, Ukrayna və Avropa rəsmiləri İranın Rusiyaya minlərlə pilotsuz uçuş aparatı və artilleriya mərmiləri verdiyini bildirirlər.

ABŞ Mərkəzi Qüvvələr Komandanı general Kristofer Kavoli ötən ay verdiyi açıqlamada, İranın Rusiyaya 400-dən çox qısa mənzilli ballistik raket verdiyini bildirib. Bu bəyanat “Fath-360” sistemlərinə açıq istinad kimi qiymətləndirilir.

Hələlik İranın Rusiyaya başqa raket növləri göndərdiyinə və ya Rusiya qüvvələrinin “Fath-360” istifadə etdiyinə dair rəsmi məlumat yoxdur.

Bəsti Rəfizadə
Sfera.az

“Fath-360” raketləri yola çıxır: İrandan Rusiyaya hərbi dəstək