Vatikanın Müqəddəs Pyotr Bazilikasında keçirilən mərasimdə Katolik Kilsəsinin yeni rəhbəri Papa XIV Leo ilk xütbəsini verib. Ənənəvi ayinlər çərçivəsində keçirilən mərasimdə Papa əvvəlcə ingiliscə, daha sonra isə italyanca çıxış edib.

Sfera.az xarici mediaya istinadən xəbər verir ki, Papa Leo xütbəsində kardinallara və inanclılara səslənərək insanları "Tanrının yaratdığı möcüzələri kəşf etməyə” çağırıb.

O, çıxışı zamanı Müqəddəs Kitabdan sitat gətirərək, “Sən Məsihsən, yaşayan Tanrı Oğlusan” sözlərini xatırladıb.

Yeni Papa "Tanrı məni həvarilərin Şahzadəsinin (İsanın) varisi olaraq seçdi və bu müqəddəs əmanəti mənə təslim etdi”,-deyərək, Kilsənin sədaqətli rəhbəri olacağına söz verib.

Papa Leo çıxışında Katolik Kilsəsinin missionerlik fəaliyyətlərinin vacibliyinə diqqət çəkib. O bildirib ki, İncili təbliğ etməyin çətin olduğu, inananların lağa qoyulduğu və ya rədd edildiyi bölgələrdə fəaliyyətlərin gücləndirilməsi zəruridir. Bununla o, sələfi Papa Fransiskin diqqət yetirdiyi kənarda qalmış bölgələrə önəm verməyə davam edəcəyinin mesajını verib.

Papa həmçinin ruhani şəxsləri təvazökar olmağa çağırıb və Müqəddəs İqnatiusun “Məsihin ucalığını kölgələməmək üçün özünüzü kiçiltməlisiniz”, - fikrini xatırladıb.

XIV Leo inancın əhəmiyyətinə toxunaraq bildirib: “İnancın çatışmazlığı tez-tez həyat mənasının itməsi, mərhəmətin unudulması, insan ləyaqətinin pozulması, ailə böhranı və cəmiyyətimizi sarsıdan digər faciəvi yaralarla müşayiət olunur”.

Bəsti Rəfizadə
Sfera.az

Yeni Papa ilk xütbəni verdi: “İncili təbliğ edin"