"Putinin “kölgə donanması”nı məhv edəcəyik" - Kir Starmer

Neft və qaz ixracına dair mövcud sanksiyalardan yayınmaq üçün istifadə edilən Rusiya neft tankerlərinin donanmasına yeni məhdudiyyətlər tətbiq ediləcək.

Sfera.az xəbər verir ki, bu barədə Britaniya hökumətinin mətbuat xidməti məlumat yayıb.

Məlumatda bildirilib ki, 2024-cü ilin əvvəlindən bu yana 18 milyard funt sterlinq dəyərində yük daşıyan 100 gəmiyə qarşı tədbir görüləcək. Sözügedən tankerlər ümumilkdə 24 milyard dollardan çox dəyərdə yük daşıyıb. Onların bəziləri isə dənizin altından keçən kritiki-əhəmiyyətli kabel sisteminə zərər vurub.

Nazirlər Kabinetindən qeyd edilib ki, Britaniya sualtı infrastruktura təkcə telekommunikasiya kabelləri vasitəsilə təmin olunan rabitə baxımından deyil, həm də elektrik enerjisi, neft və qaz kimi həyati əhəmiyyətli enerji resurslarının tədarükündə güclü şəkildə bağlıdır.

Böyük Britaniyanın Baş naziri Kir Starmer söz verib ki, Britaniya Rusiya Prezidenti Vladimir Putinin “kölgə donanması”nı məhv etmək, onun döyüş maşınını neft gəlirlərindən məhrum etmək və sualtı infrastrukturu qorumaq üçün əlindən gələni edəcək.

Yeni sanksiyaların şifahi olaraq bu gün Starmer tərəfindən Osloda keçiriləcək Birləşmiş Ekspedisiya Qüvvələrinin (JEF) sammitində elan ediləcəyi gözlənilir.
 

Firuzə Əliyeva
Sfera.az