Hindistan və Pakistan arasında gərginlik: Aviaşirkətlərin sxemi dəyişdi

Hindistan və Pakistan arasında baş verən hərbi toqquşmalar beynəlxalq hava nəqliyyatında ciddi dəyişikliklərə səbəb olub. 

Sferaz.az “Milliyet” nəşrinə istinadən xəbər verir ki, gərginliyin artması nəticəsində, bir sıra aviaşirkətlər, o cümlədən Türk Hava Yolları və Pegasus, uçuş marşrutlarını dəyişmək və ya ləğv etmək qərarına gəlib.

Hindistanın ötən ay baş vermiş ölümcül terror aktına cavab olaraq raket zərbəsi endirməsi iki nüvə silahına malik qonşu ölkə arasında mübahisəli sərhəd zonasında artilleriya atəşlərini daha da intensivləşdirib. Bu vəziyyət, hava məkanının təhlükəsizliyini şübhə altına alaraq, aviaşirkətləri təcili addımlar atmağa vadar edib.

Cənubi Koreyanın “Korean Air” aviaşirkəti Seul-İnçeon – Dubay reysini artıq Pakistan hava məkanından deyil, Myanma, Banqladeş və Hindistan üzərindən keçən cənub marşrutu ilə həyata keçirməyə başlayıb. Şirkət rəsmisi AFP-yə açıqlamasında qeyd edib ki, vəziyyət diqqətlə izlənilir və zərurət olduqda əlavə dəyişikliklər ediləcək.

Türk Hava Yolları (THY) sərnişin təhlükəsizliyinə önəm verərək Pakistan hava məkanından istifadəni müvəqqəti dayandırıb. Bu qərar, bölgədə döyüş təyyarələrinin aktiv hərəkəti və raket təhdidləri səbəbilə qəbul edilib. Pegasus Hava Yollarının İstanbul-Kəraçi reysi isə hadisələrin baş verdiyi gün geri dönüb. Hər iki aviaşirkət vəziyyəti daim izlədiklərini və uçuş planlarını yeni inkişaflara əsasən tənzimləyəcəklərini açıqlayıb.

Hazırda münaqişə zonasının yaxınlığında hava təhlükəsizliyi ilə bağlı ciddi narahatlıqlar davam edir və beynəlxalq aviasiya sektorunun hadisələrə reaksiyası gündəmdə qalmaqdadır.

Fidan Hacızadə
Sfera.az