"Müharibənin bitməsi üçün tək atəşkəs yetmir"- Lavrov

Rusiya xarici işlər naziri Sergey Lavrov “The International Affairs” jurnalında dərc olunan “Rusiya və Vyetnam: 75 illik dostluq, etimad və qarşılıqlı yardım” adlı məqaləsində Ukrayna böhranının davamlı həllinin yalnız atəşkəslə mümkün olmadığını bildirib.

Sfera.az “TASS”a istinadən xəbər verir ki, Lavrov, Vyetnamın Ukrayna münaqişəsi ilə bağlı balanslı mövqeyinə görə təşəkkür edərək vurğulayıb ki, sadəcə atəşkəs və ya təmas xəttində hərbi əməliyyatların dayandırılması problemin qalıcı həllini təmin etmir: “Əsl sülhə nail olmaq üçün münaqişənin əsas səbəbləri aradan qaldırılmalıdır”, – Rusiya diplomatiyasının rəhbəri qeyd edib.

Onun fikrincə, münaqişənin əsas səbəblərindən biri NATO-nun şərqə doğru genişlənməsi və Ukraynanın alyansa cəlb olunması cəhdləridir ki, bu da Rusiyanın təhlükəsizliyinə təhdid yaradır.

Lavrov həmçinin bildirib ki, 2014-cü ildə hakimiyyəti zorakılıqla ələ keçirən Kiyev rejimi Rusiya və rus dünyasına aid hər şeyi dili, mədəniyyəti, adət-ənənələri, kanonik pravoslavlığı və rusdilli medianı məhv etməyə çalışır:

“Kiyev rejiminin nəzarətində olan ərazilərdə insan hüquqlarına tam hörmət göstərilməsi məsələsi də az əhəmiyyət kəsb etmir”, – o, vurğulayıb.

Fidan Hacızadə
Sfera.az