Almaniyanın yeni kansleri seçildi - Nələr gözlənilir?
Xristian Demokrat və Xristian Sosial Birliklərinin mühafizəkar blokundan Almaniya kansleri vəzifəsinə namizəd olan Fridrix Merz qalib gəlib. Bundestaq onun namizədliyini ikinci cəhddə təsdiqləyib. Siyasətçi tələb olunan 325 səsdən 316-nı toplaya bilib.O, ilk cəhddə 310 səs toplamışdı.
Maraqlıdır, bundan sonra nələr olacaq?
Mövzu ilə bağlı Sfera.az-a açıqlamasında siyasi şərhçi Kənan Novruzov bildirib ki, F.Merz kanslerliyə əsas namizəd olduğu üçün bu, gözlənilən idi.
K.Novruzov qeyd edib ki, F.Merz keçmiş hakimiyyəti sərt tənqid edirdi:
"F.Merz hələ namizədlik dövründə demişdi ki, əgər hakimiyyətə gəlsə, iqtisadi və miqrasiya siyasətində əsaslı dəyişikliklər edəcək. Onun nə qədər uğurlu olub -olmayacağını zaman göstərəcək. Qeyd etmək lazımdır ki, yeni kanslerin işi heç də asan olmayacaq. Çünki Almaniya daxilində köklü problemlər var. Onların yaxın gələcək üçün birdəfəlik həlli demək olar mümkün deyil.
İkinci bir tərəfdən isə ölkənin xarici siyasətində də ciddi dəyişikliklərin olacağı gözlənilmir. Bəzi regional məsələlərlə bağlı epizodik redaktələr edilə bilər. Amma bu dəyişikliklər ciddi nəticə ilə yadda qalmayacaq".
Siyasi şərhçi bu gün dünyada çox ciddi geosiyasi proseslərin getdiyini diqqətə çatdırıb:
"Dünya nizamı yenidən formalaşır. Belə bir vəziyyətdə dünya dövlətlərinin ənənəvi siyasətlərindən imtina edib, ani manevr etmələri mövcud xaosu daha da dərinləşdirə bilmir. Odur ki, rəsmi Berlin buna getməyəcək. Və Avropanın güclü aktorlarından biri kimi ənənəvi siyasətini davam etdirəcək.
Ümumiyyətlə, Almaniyanın xarici siyasətində ciddi dəyişikliklər olmayacaq. Bu, Cənubi Qafqaz region ilə bağlı da belə olacaq.
F.Merz təcrübəli siyasətçi olsa da, heç vaxt fərqlənməyib. Onun diqqət göstərdiyi əsas sahələrdən biri miqrasiya, o cümlədən qanunsuz miqrasiyaya qarşı mübarizədir. Bu məsələ Almaniyanın yeni iqtidarı dövründə, yəqin ki, prioritet olacaq. Dünya dövlətləri ilə münasibət isə aşağı- yuxarı olduğu kimi davam edəcək".
Firuzə Əliyeva
Sfera.az
